परराष्ट्रविद् हिरण्यलाल श्रेष्ठया ‘नेपाल–जापान बौद्ध सम्बन्ध’ पिदन

परराष्ट्रविद् हिरण्यलाल श्रेष्ठया ‘नेपाल–जापान बौद्ध सम्बन्ध’ पिदन


बैशाख १२ - परराष्ट्रविद् हिरण्यलाल श्रेष्ठं च्वयादिगु सफू ‘नेपाल–जापान बौद्ध सम्बन्ध’ पिहाँवगु दु। नेपाल जापान कल्चरल एक्सचेन्ज एशोसियशनं शनिबाः यलया बंखुबहालय् याःगु ज्याझ्वःलय् वाङ्मय शताब्दी पुरुष सत्यमोहन जोशीइ सफूया पितब्वज्या यानादिगु खः।

नेपाल जापान कल्चरल एक्सचेन्ज एशोसियशनया अध्यक्ष डा राजेन्द्र मान श्रेष्ठया सभापतित्वय् जूगु ज्याझ्वलय् शताब्दी पुरूष सत्यमोहन जोशीइ नेपाल व जापानदथुइया सम्बन्धयात कला, संस्कृति व धार्मिक गतिविधिलिसें स्वानाः सफू च्वयातगु धयादिल।

ज्याझ्वलय् पूर्व राजदूत नं जुयादिम्ह च्वमिलिसें परराष्ट्रविद् हिरण्यलाल श्रेष्ठं सफूतिइ बुद्ध धर्म व दर्शनया आधारभूत विषयनापंनापं २ देय् दथुइया धार्मिक व साँस्कृतिक सम्बन्ध विस्तारयात लिसें ऐतिहासिक जापानी व नेपाली धर्मगुरुलिसें व्यक्तित्वतयगु नं चर्चा यानातयागु धयादिल।

ज्याझ्वलय् बौद्ध विद्वानलिसें लोट्स एकेडेमिक कलेजया प्राचार्य धर्मसुन्दर बज्राचार्य व सीमाविद् बुद्धिनारायण श्रेष्ठं सफूयात कया टिप्पणी यानादिगु खः।

अथेहे ज्याझ्वलय् सांसद कृष्णलाल महर्जनं च्वमि श्रेष्ठयात पारितोषिक लिसें सफू लःल्हानादिगु खः।

ज्याझ्वलय् नेपाल जापान कल्चरल एक्सचेन्ज एशोसियशनया पदाधिकारी, बौद्ध ख्यःयापि नाजांपि व्यक्तित्व, लगायतया ब्वति दुगु खः।

‘नेपाल–जापान बौद्ध सम्बन्ध’ सफू नेपाल जापान कल्चरल एक्सचेन्ज एशोसियशन पिकागु खः। नेपाल जापान दथुइ ई. सं. १९५६ य् दौत्य सम्बन्ध कायम जूगु खः।