नेवाः जातीय महासंघ गठन 

नेवाः जातीय महासंघ गठन 


असोज २४ -  नेवाः समुदाय दुनेया थीथी जातिय संगठनतय् मंकाः संगठन कथं नेवाः जातिय महासंघ गठन जूगु दु । नेवाः समुदाय दुनेया थीथी १८ जातीय संगठनया मुनां शनिबाः महासंघया तदर्थ कार्य समिति गठन याःगु खः।

१८ जातिय संगठनलिसें संचारकःमी, नेवाः अभियानकःमीतकंया उपस्थितीइ नीस्वंगु ९ दुजःया तदर्थ समितिइ नेपाल खड्गी सेवा समितिया मनोज नेवाः खड्गीयात नायः ल्यःगु दुसा स्यस्यः समाजया दानदास श्रेष्ठयात न्वकू ल्यःगु दु । अथेहे, राजोपाध्याय समाजया बिराजकाजी राजोपाध्याययात मू छ्यान्जेया भाला ब्यूगु दु । रजक समाजया किरण मघैया छ्यान्जे पदय् च्वनादीगु दु । दांभरिं पदय् पुतुवार नगरकोटी राजवाहक (पुनरा) विकास समाजया सागर पुतुवारयात तःगु दु । प्यम्ह दुजलय् नेपाल तण्डुकार समाजया सुरेश तण्डुकार, बलामी समाजया बेखराम वलामी, कपाली समाजया श्यामकृष्ण दर्शनधारी व नेपाल माली समाजया अमर मालीयात तःगु दु । 

तदर्थ समिति गठन धुंकाः समितिया सकल पदाधिकारी व दुजःपिन्त नेवाः देय् दबूया पूर्व छ्यान्जेलिसें नेवाः संस्कृति सम्वन्धि अध्येता जितेन्द्र विलास बज्राचार्यं खादा क्वखायेकाः  भिन्तुना देछानादीगु खः।

महासंघया तदर्थ कार्य समितिया नायः ल्ययेधुंकाः नवासें मनोज नेवालं नेवाः समाजया शक्ति जुयाच्वंगु जातिय संगठनतय्त नेतृत्व वर्गं कार्यकर्ताया रुपय् जक प्रयोग यानावःगुलिइ आः सकसिगु शक्ति छथाय् मुंकाः थप उर्जाशील जुयाः न्ह्याःवनेगु धयादिल । आः १८ जातिय समाज दुथ्याःगुलिइ आवश्यकता कथं मेगु जातीय समाज नं तनावनेगु व आवश्यक प्रकृयाय् न्ह्याःवनेगु वय्कलं धयादिल ।

महासंघं वइगु कार्तिक ६ गते स्वन्ति व नेपाल सम्वत न्हूदँ ११४२ या लसताय् भिंतुना कालबिल ज्याझ्वः यायेत्यंगु दु ।