यलय् मतयाः न्ह्यानाच्वंन, नौबाजंया प्रदर्शन धासाः मजुइगु

यलय् मतयाः न्ह्यानाच्वंन, नौबाजंया प्रदर्शन धासाः मजुइगु
सामाजिक संजाल, २०७७ साउन २१


साउन २१ - कोरोना भाइरसया संक्रमणया कारणं यलय् आ: साधारणं किसिमं मतया: न्ह्यानाच्वंगु दु।

बाजं मतसें ग्वसात्वाः पाखें मजिमगापिं मनूत जक मुना थौं सुथय् यलया ओकुबहालं मतया: न्ह्या:गु खः सा थुगुसिइ ग्वसात्वाःलं मनूत मुंका मयंकेगु धागुलिइ व्यक्तिगत रूपं नं दच्छिया दुने मदुम्ह थ: छेँज:या लुमन्तिइ मतयाः वनाच्वंगु दु।

न्हिच्छिया दुने मतया: यलया थीथी बहा:बही लिसें थीथी द्य: व चिभा:या पुजा याना: क्वचाइ । विशेषरूपं बौद्ध धर्मावलम्बीतयसं दच्छिया दुने मदुम्ह थ: छेँज:या लुमन्तिइ मत लिसें थीथी ज्वलं दान यायकथं मतया: वनेगु चलन दु। दँयदँसं सापारू सर्खुनु न्ह्याइगु मतया: यलया झिगू त्वालं पालंपा: न्ह्याकी। थुगुसी ओकुबहाल: त्वालं न्ह्या:गु मतया: यलन्यंकया थीथी बहा:बही लिसें चिभा:द्य:या पुजालिपा सनिलय् अन हे वया: क्वचाइ।

मतया:या हे झ्वलय् थाैं नौबाजं थाना: यलदेय् चा:हिलेमागु खः तर कोरोनाया कारणं बाजंया प्रदर्शन यायेगु ज्या धासाः मजुइगु ग्वसात्वालं धागु दु। थाैया दिनय् धा:, दम्व:खिं, न्येकू लिसें थीथी गुताजिया नेवा: परम्परागत बाजं सहितया टोलीं यलया थीथी थासय् नौबाजा थाना:क्यनीगु चलन दु। उकिमध्ये नं यल लायकू न्ह्य:नेया कात्तीदबुलिइ नौबाजा थाइगुयात विशेष आकर्षण कथं काइ।

जुजु बालार्चनदेवया पालंनिसें मतया: न्ह्याकेगु चलन सुरु जूगु विश्वास दु।