बुंगद्यःया जात्रा - कन्हय् द्यःसाला छ्वयलाभु , कसं भुज्या हनिगु

बुंगद्यःया जात्रा - कन्हय् द्यःसाला छ्वयलाभु , कसं भुज्या हनिगु


भदाै २० - कोरोना संक्रमण अप्वयाच्वगुलिइ  बुंगद्यःया जात्रा चिहाकः याना न्यायेकेत सहमती कथं कन्हय् द्यः सालिगु जुगु दु।

बुगद्यः जात्रा व्यवस्थापन कार्यदल १९ क्वःगू जातीय खलः पुचःया कजि चन्द्र महर्जनं कोभिड महामारीया कारण देशय् न्हिया न्हिथं कोरोना सङ्क्रमित थप जुयाच्वगुलिइ जोखिम कम यायेत शुक्रबाः बुंगद्यःया क्षमापूजा जुगु धासें कन्हय् भदौ २१ गते रथयात पुच्वया सोह्रखुट्टे पाटीतक रथ सालेगु धकाः जानकारी बियादिल। कन्हय् न्हिनसिया ३ ताइलय् पुच्वय् मुना ४ ताइपाखें द्यः सालेत तयारी जुयाच्वंगु दु। कन्हय् छवयलाभु याइगु जुगु दु। अथेहे कसं २२ गते भुज्या हनिगु व साइत स्वइगु व सम्भवतः  २६ गते यदि साइत वसाः बुंगद्यःयात  बुंगय् विज्याकेगु धकाः वयकलं धयादिल।

बुंगद्यःया जात्राया विधि प्रकृया आः रथ दुगु ठासय् यायेगु व आकिवं निसें न्हापान्हापाथें हे जात्रा याइगु जुगु दु।वंगु भदौ ११ गते ज्यापू समाज यलय् रथलिसें सम्बन्धित सरोकारवालातयगु विशेष बैठक च्वना मलमास न्हय हे जात्रा यायेगु, गुठी संस्थानया प्रधान ज्याकुया विज्ञलिसें परामर्श यानावयाच्वगु  निचोडयात  जातीय खलः पुचतयसं सम्बन्धित फुक्कसिगु उपस्थिति दइगु बैठकपाखें पारित यायेगु व वहे कथं रथयात्रा यायेगु भद्र सहमति जुगु खः। अथेहे शनिबाः ज्यापू समाज यलय् च्वंगु थीथी १९ जातिय समाजलिसें  नेपालभाषा मंकाः खलःया नायःया बैठकं कन्हय्  बुंगद्यःया जात्रा संचालन यायेगु बारेय् धलः सार्वजनिक याःगु खः। 

थुगुसिइ विषम परिस्थितिइ जोखिम म्हो यायेगु नितिं  न्हापाथें नखत्या सःतेगु व नखत्या वनेगु ज्या पूर्ण रुपं बन्द यायेत नेपालभाषा मंकाः खलः लिसें यलय् च्वंगु थीथी १९ जातिय समाजं इनाप यागु दु।

बुंगद्यःयात वंगु  साउन १० गते रथय् विज्याकुगु खसाः द्यःयात रथय् विज्याकुगु प्यन्हू खुन्हू रथ सालिगु परम्परा दुगु खः। थुगुसिइ द्यःयात रथय् विज्याकेधुक्का कोरोना भाइरसया महामारीया कारण जात्रा दिनाच्वगु खः। थुगुसिइ महामारीया कारण भोटोजात्रा मयाइगु जुगु दु।