साफ फुटबल : उपाधिया लागि थाैं नेपाल व भारत म्हितिगु

साफ फुटबल : उपाधिया लागि थाैं नेपाल व भारत म्हितिगु


असोज ३० - साफ च्याम्पियनसिप फुटबलया उपाधिया लागि नेपाल थौं भारतलिसें म्हितेत्यंगु दु। कासाः नेपाली ईकथं हन्चा बहनी ८ः४५ ताःईलय् माल्दिभ्सया मालेय् दुगु राष्ट्रिय रंगशालाय् जुइ। थौं निगुलिं टिम उपाधि त्याकेगु लक्ष्यनापं मैदानय् कुहाँवनिइ।

५ देय् सहभागी राउण्ड रोबिन लिगया आधारय् जूगु  प्रतियोगिताया शीर्ष ठासय् च्वनाः भारतं फाइनल म्हितेत्यंगु खः । नेपालं निगूगु ठासय् च्वनाः फाइनलय् ठाय् सुरक्षित याःगु खः। साफ इतिहासइ नेपाल न्हापांखुसि फाइनल थ्यंगु खः ।

थौंया फाइनल त्यासाः नेपालं इतिहास दयेकिइ। तर, थौंया कासाः त्याकेत थाकू। नेपालं थौं भारतलिसें थ्वया न्हय्या कासाय् द्वकूगु पक्ष सुधार यायेमानिइ। थौंया कासाः नेपालयात भारतलिसें बदला कायेगु अवसर नं जुइ। थ्वया न्हय् समूह चरणया कासाय् नेपाल भारतलिसें १–० गोल अन्तरं  पराजित जूगु खः।

नेपालया सहायक प्रशिक्षक किरण श्रेष्ठं फाइनल त्याकाः इतिहास दयेकेगु सुनौलो अवसर सितिं छ्वयकेमबिइगु धयादिल।