साफ च्याम्पियनसिप फुटबलया उपाधि त्याकेगु नेपाःया लक्ष्य पूमवन 

भारतलिसें ३–० गोल अन्तरं पराजित 

साफ च्याम्पियनसिप फुटबलया उपाधि त्याकेगु नेपाःया लक्ष्य पूमवन 


असोज ३१ - साफ च्याम्पियनसिप फुटबलया उपाधि त्याकेगु नेपाःया लक्ष्य अथें हे जूगु दु। साफ च्याम्पियनसिप फुटबल २०२१ या फाइनलय् भारतलिसे पराजित जुसेलिं नेपाःया साफ च्याम्पियन जुइगु लक्ष्य पूमवंगु खः।

म्हिगः बहनी माल्दिभ्सया राजधानी मालेय् उपाधिया लागि जूगु कासाय् नेपाःयात ३–० गोल अन्तरं पराजित यानाः भारतं ८ क्वःखुसि उपाधि त्याकूगु खः। भारतं ८ क्वःखुसि उपाधि त्याकेगु झ्वलय् ३  गोल निगूगु हाफय् याःगु खः। निगूगु हाफय् भारतं १ मिनेटया अन्तरय् २ गोल यासेलिं नेपाल दबाबय् लागु खः। कासाया ४९ मिनेटय् भारतया लागि कप्तान सुनील क्षेत्रीइ न्हापांगु गोल यागु खः। थ्वलिसें सुनीलं साफ च्याम्पियनसिप २०२१ य् ५ गोल यायेत ताःलागु खः।  ५० मिनेटय् भारतं अग्रता दोब्बर याःगु खः । सुरेश सिंहं भारतया लागि गोल यात । भारतया लागि ३ गोल अब्दुल समादं याःगु खः।

थ्वया न्हय् साफया फाइनलय् थ्यनेमफूगु नेपालं थ्वपालय् साफय् फाइनलय् थ्यनाः इतिहास दयेकूगु खः। तर उपाधि त्याकाः मेगु इतिहास दयेकेत धासाः नेपालं मफत ।

सन् २०१३ य् नेपालय् जूगु साफय् नेपालं भारतयात २–१ पराजित याःगु खः । अनंलिपा भारतविरुद्ध म्हितूगु ९ मध्ये नेपाल ७ कासाय् पराजित जूगु दुसाः २ कासाय् बराबरी जूगु खः।