हलिमय् दकले न्हापां त्रिविइ सुशासन व भ्रष्टाचार निवारण अध्ययन शुरु जुइत्यन

हलिमय् दकले न्हापां त्रिविइ सुशासन व भ्रष्टाचार निवारण अध्ययन शुरु जुइत्यन


साउन १३ - हलिमय् अप्वः भ्रष्टाचार जुइगु देया धलखय् लानाच्वंगु नेपालय् न्हापांगु विश्वविद्यालय त्रिविइ हलिमय् हे दकले न्हापां सुशासन व भ्रष्टाचार निवारण अध्ययन अध्यापन याकीगु जूगु दु।  त्रिविं थुगुसिनिसें हे स्नातकाेत्तर तहलय् निदँया ज्याझ्वः अन्तर्गत उगु विषय ब्वंकेत्यंगु खः।

त्रिविया मानविकी तथा सामाजिक शास्त्र संकाय अन्तर्गत न्ह्याकेत्यंगु ज्याझ्वलं देसय् सुशासन कायम यायेत व भ्रष्टाचार पाः यायेत ग्वहालि जुइगु आशा यानागु डीन प्राडा कुसुम शाक्यं धयादिल।

त्रिविया प्रांगणय् जूगु ज्याझ्वलय् विषयगत म्हसिके लिसें पत्रकार नापलायेगु ज्याझ्वलय् भ्रष्टाचार विराेधी अभियन्ता भरत जंगमं थम्हं थुगु विषय त्रिविइ दुछ्वयेत नीन्यादँ न्ह्याेनिसें कुतः यानाच्वनागु धासें आः ब्वंकेत्यंगुलिं लसता प्वंकादिल।

ज्याझ्वःया कजि डा० याेगेश रञ्जितं ज्याझ्वः व पाठ्यक्रमयात कयाः निदँया ज्याझ्वलय् न्ह्यागु विषयलय् स्नातक यानातःपिन्सं नं सुशासन व भ्रष्टाचार निवारण अध्ययन ब्वने फइगु, फर्म अनलाइन माध्यमं जायेके फइगु व शुल्क नं पूरा ज्याझ्वःया न्यूनतम १ लख ७३ द्वः तका जक तुइ धयादिल।

ज्याझ्वलय् ट्रान्सपेरेन्सी इन्टरनेशनलया नायः पद्मिनी प्रधानाङ्ग, राजनीति शास्त्रया प्राध्यापक गेहेन्द्र लाल मल्ल लगायतपिन्सं नं ज्याझ्वः ताःलायेमा धकाः भिंतुनादीगु खः।