दोलखा भीन्द्यो देगःया मूलुखा कन्हय् निसें चालिगु

दोलखा भीन्द्यो देगःया मूलुखा कन्हय् निसें चालिगु


साउन २ - दोलखाया भीन्द्योया देगःया मू लुखा कन्हय् निसें चालिगु जुगु दु। थ्वनापं कन्हय् निसें भक्तजनतयसं देगः चाहिलेखनिगु जुगु दु। 

भीमेश्वर नगरपालिका वडा ल्याः २ या अध्यक्ष विराजमान श्रेष्ठ नापं भीमेश्वर मन्दिर गुठी तथा पुजा व्यवस्थापन समितिया बैठकं कन्हय् निसें देगःया मूलुखा चायेकेगु निर्णय याःगु खः। देगःया मू लुखा चायेके न्हय् थाैं विधिविधाननापं क्षमा पुजा जुगु वडा अध्यक्ष श्रेष्ठं जानकारी बियादिल। कन्हयनिसे दर्शनया लागी वइपिं दर्शनार्थीतयगु लागी साब्बं लखं ल्हा सिलेगु व सेनिटाईजरया व्यवस्था जुइगु वडा अध्यक्ष श्रेष्ठं धयादिल।अथेहे भक्तजनतयत मास्क अनिवार्य रुपय् तयेत न इनाप यानातगु दु।

मू लुखा चासाः नं देगःया दुनेया लुखा धासाः तिना हे तइगु जुगु दु । कोरोना भाइरसया संक्रमण फैले जुइफइगु धासें सरकारं चैत्र ११ गतेनिसें लकडाउनया घोषणा यासेलिइ भीन्द्योया देगः दर्शनार्थीया लागी बन्द यागु खः। थ्वदथुइ देगलय् थ्यकवनिपिं भक्तजनतयसं मू लुखां पिने हे  दर्शन यायेगु व्यवस्था याःगु खः।