टोखाय् आइसोलेसन सेन्टर निर्माण

टोखाय्  आइसोलेसन सेन्टर निर्माण


भदौ ८ -  येँया टोखा नगरपालिकां झिन्हयेगू शैय्याया आइसोलेसन सेन्टर निर्माण याःगु दु।

कोरोना सङ्क्रमित विरामीया उपचारया लागि टोखा चण्डेश्वरी प्राथमिक स्वास्थ्य केन्द्रया भवनय् आइसोलेशन सेन्टर स्थापना जुगु नगरपालिकाया प्रमुख प्रकाश अधिकारीं धयादिल।

नगरपालिकां  शुक्रबाः सूचं पिकया प्राथमिक स्वास्थ्य केन्द्रय् आइसोलेसन सेन्टर स्थापना यायेगु जुसेलिइ केन्द्रया सेवा थनिनिसें  वडा नं २ या परिसरय् दुगु आकस्मिक भवनं सञ्चालन यायेगु जानकारी नं बिउगु खः । प्राथमिक स्वास्थ्य केन्द्रं विरामी जाँच, परिवार नियोजन, गर्भवती जाँच, क्षयरोग उपचार सेवा बियावयाच्वगु दु ।

स्वनिगया नगरपालिका प्रमुखया बैठकं स्वनिगःदुने ५००० शय्या क्षमताया आइसोलेसन सेन्टर निर्माण यायेगु निर्णय याःकथं टोखा नगरपालिकां नं आइसोलेसन सेन्टर विस्तार याःगु खः । आः १७ शैय्या क्षमताया आइसोलेसन सेन्टर स्थापना यागु व  सङक्रमित बिरामीया चापयात स्वयाः १०० शैय्यातक थ्यकेगु नगरप्रमुख अधिकारीं धयादिल ।

टोखा नगरपालिकाय् सोमबाः सुथय् तक ९२ म्ह कोरोना सङ्क्रमित दुसाः इपिं मध्ये २९  म्ह लायेकाः छेँय् वनेधुक्कुगु व  ६३ म्हसिगु वासः जुयाच्वगु नगरप्रमुख अधिकारीं धयादिल ।

स्वनिगलगायत देयन्यक हे संक्रमतिया ल्याः अप्वसेलिइ आइसोलेसन बेडया अभाव जुयाच्वंगु दु।