प्रधानमन्त्रीया आह्वानय् थाैं सर्वदलीय बैठक

प्रधानमन्त्रीया आह्वानय् थाैं सर्वदलीय बैठक


मंसिर २३ -  प्रधानमन्त्री केपी शर्मा ओलीइ थौं सर्वदलीय बैठक सतादिगु दु । वयकलं प्रधानमन्त्री निवास बालुवाटारय् सुथसिया ११ ताईया लागि सर्वदलीय बैठक सतादिगु खः ।

बैठकय् संघीय संसदय् प्रतिनिधित्व याइगु राजनीतिक दलया प्रतिनिधीतयत ब्वति कायेत इनाप याःगु प्रधानमन्त्री ओलीया प्रेस सल्लाहकार सूर्य थापां धयादिल । राष्ट्रिय राजनीतिया समसामयिक विविध विषयलय् सहलह यायेत प्रधानमन्त्री ओलीइ सर्वदलीय बैठक आह्वान यानादिगु वयकया धापू दु । लिपांगु इलय् पूर्व राजावादीतयगु विरोधया ज्याझ्व, नेपाली कांग्रेससहितया दलत सरकार विरोधी आन्दोलनय् वनिपिं  तयारी लगायत थीथी समस्याबारे थौया बैठकय् प्रधानमन्त्री ओलीइ सहलह यानादिगु वयकया  सचिवालयं धागु दु ।

थ्वहे दथुइ, प्रमुख प्रतिपक्षी दल नेपाली कांग्रेसं सर्वदलीय बैठकय् तयेत एजेण्डा तय याःगु दु । कांग्रेस सभापति शेरबहादुर देउवां सर्वदलीय बैठकया लागि कांग्रेसया पाखें एजेन्डा तयार यायेत म्हिगः शीर्ष नेतातयगु बैठक सतादिगु खः । कोरोनाया रोकथाम व नियन्त्रणय् सरकार असफल जुगु, भ्रष्टाचार अप्वगु, सरकारया गतिविधिया कारण नागरिकय् निराशा ब्वलगु, राजतन्त्रया पक्षय् सडकय् प्रदर्शन अप्वगु थज्याःगु विषयलय् सरकारयात ध्यानाकर्षण याकेत कांग्रेसं तयारी याःगु दु ।

प्रधानमन्त्री ओलीइ थ्वया न्हय् वंगु जेठय् भारतं लिपुलेक–कालापानीइ नेपाली भूभाग अतिक्रमण याना सडक दयेकुसेलिइ सहलह यायेत सर्वदलीय बैठक सतादिगु खः ।