बाग्मती प्रदेशया मुख्यमन्त्री शाक्यं विश्वासया मत कयादीगु

बाग्मती प्रदेशया मुख्यमन्त्री शाक्यं विश्वासया मत कयादीगु


असोज २४ - बाग्मती प्रदेशया मुख्यमन्त्री अष्टलक्ष्मी शाक्यं थनिनिसें सुरु जुइगु प्रदेशसभाया ९ क्वःगु अधिवेशनय् विश्वासया मत कयादीत्यंगु दु। शाक्य उपाध्यक्ष जूगु नेकपा एमाले विभाजन जुयाः नेकपा (एकीकृत समाजवादी) पार्टी गठन जुसेलिं वय्कलं विश्वासया मत कयादीत्यंगु खः।

संविधानया धारा १८८ या उपधारा (२) य् मुख्यमन्त्रीइ प्रतिनिधित्व याइगु दल विभाजित जुसाः वा प्रदेश सरकारय् सहभागी दलं समर्थन लित कासाः ३० न्हूदुने मुख्यमन्त्रीइ विश्वासया मत कायेमाःगु व्यवस्था दु । एमालेयापाखें एकल बहुमतनापं शाक्य मुख्यमन्त्री जुयादीगु खः । बाग्मती प्रदेशय् सभामुखनापं १०९ सांसद दु । विश्वासया मत कायेत ५५ सांसदया समर्थन माः। तर पार्टी विभाजन न्हय् एमालेया ५६ सांसद दुगुलिं विभाजनलिपा १३ म्ह सांसद नेकपा (एकीकृत समाजवादी) इ वंगुलिं आः बाग्मती प्रदेशसभाय् एमालेया ४३ सांसद दु ।

गठबन्धनय् दुगु माओवादी केन्द्रया २३, कांग्रेसया २२ व एकीकृत समाजवादीया १३ यानाः ५८ सांसद दु । इमिसं शाक्ययात मत मबिइगु धागु दु । थुपिं दलबाहेक विवेकशील साझा पार्टीया ३, नेमकिपा २, राप्रपा २ व स्वतन्त्र १ म्ह सांसद दु ।

शाक्य वंगु भदौ २ गते नेपाःया न्हापांम्ह महिला मुख्यमन्त्रीइ नियुक्त जुयादीगु खः। गठबन्धनपाखें न्हूम्ह मुख्यमन्त्रीया रुपय् एकीकृत समाजवादी संसदीय दलया नेता राजेन्द्र पाण्डेयात न्ह्यने यंकेत तयारी जूगु दु। तर सहमती धासाः मजुनिइ।

बाग्मती प्रदेशया सभामुख सानुकुमार श्रेष्ठं दलतलिसें परामर्श यायेत आः सुथय् ११ ताःइलय् कार्यव्यवस्था परामर्श समितिया बैठक सतादीगु दु । प्रदेशसभा सचिवालयय् विश्वासया मत काय्गु प्रस्ताव पेश यायेगु सूचं थ्यंगु दु।