वादेशं ५२ दँ न्हय् खुया यंकुगु बज्रबाराही द्यःयात आगँछेय्  प्रतिस्थापन यात

वादेशं ५२ दँ न्हय् खुया यंकुगु बज्रबाराही द्यःयात आगँछेय्  प्रतिस्थापन यात
फोटोः


बैशाख ७ - यलया वादेशं ५२ दँ न्हय् खुया यंकुगु बज्रबाराही द्यःयात आगँछेय्  प्रतिस्थापन याःगु दु। येँया छाउनी दुगु राष्ट्रिय संग्रहालयलय् तयाःतगु द्यःयात म्हिगः सिन्दुर जात्रा यानाः बसपार्कय् दुगु आगँछेय् प्रतिस्थापन याःगु खः।

गोदावरी नगरपालिका व बज्रवाराही खः गुठीया मंकाः कुतलय् द्यःयात थःहे ठासय् प्रतिस्थापन याःगु खः।द्यःयात छाउनी काःवनेत थेचो बाजं थाना वंगु खःसाः अनंलिपा छाउनीइ वादेयया बसपार्कलिक्क दुगु आगँछे हगु खः।

वि सं २०२५ सालय् बज्रवाराही द्यः आगछेँय् नं खुयायंकुगु व लिपा त्रिभुवन विमानस्थलय्  वांछ्वयातगु अवस्थाय् प्रहरीइ लुइकुगु मेयर गजेन्द्र महर्जनं धयादिल। खुँतयसं द्यः खुयाः विदेश यंकमफसेलिं त्रिभुवन विमानस्थलय्  वान्छ्वगु आशंका प्रहरी याःगु वयकलं धयादिल ।

थथे लुगु द्यःतयगु सुरक्षाया ग्यारेन्टी दत धासाः जक गनयाम्ह खः गन हे लितबिइगु व्यवस्था दुगुलिं खुया यकंधुक्कुंगु द्यः हाकनं खुयाः यंकि धइगु आशंकाय् सुरक्षाया लागि २०२९ सालय् बज्रबाराही द्यःयात राष्ट्रिय संग्रहालयया संरक्षणय् तगु खः। कानुनी प्रक्रिया पूरा याना नेपाल सरकार पुरातत्व विभागया निर्णयकथं गोदावरी नगरपालिकाया मेयर, उपमेयर, जिल्ला प्रशासन ज्याकु यलया प्रतिनिधि, पुरातत्व विभागया प्रतिनिधि व स्थानीय खः गुठीयारया गुठीयारतयगु उपस्थितिइ म्हिग संग्रहालय प्रमुख जयराम श्रेष्ठं खः गुठीयात द्यः विधिवत रुपं लःल्हानादिगु खः।

थुगु लुँयाम्ह ४८ सेमी तःधीकम्ह व ३३ सेमी ब्याःदुम्ह द्यः ने.सं. ७८६ स दयेकातःगु खः। वइगु वैशाख १३ गते चौलाथ्व पून्हिया झ्वलय् बज्रवाराहीया जात्रा जुइगु परम्परा दु ।