तान्त्रिक हाेमलिसें गजू तया बलम्बु महालक्ष्मी द्यःया पुनर्स्थापन

तान्त्रिक हाेमलिसें गजू तया बलम्बु महालक्ष्मी द्यःया पुनर्स्थापन


साउन २१ - नेपाः संस्कृतिया अतिकं गुह्य व महत्वं जाःगु सनातनी काैलदीक्षित तान्त्रिक हाेम यानाः बलम्बुया महालक्ष्मी द्यः पुनर्स्थापनालिसें पुनर्निर्मित देगलय् गजू छुइगु ज्या क्वचाःगु दु।

अतिकं दूर्लभ भाःपियातःगु तान्त्रिक हाेम व द्यः प्रतिस्थापना यायेत स्वनिगःन्यंकया द्यः भाजु राजाेपाध्यायपिं लिसें जाेशी व कर्माचार्यपिन्सं विधि पूजा याःगु खः।

हाेम इचंगुया पुजारी श्रीमद् राजाेपाध्यायया मूलाचार्यत्वय् रजनी राजाेपाध्याय, याेगिनी पूजा अजरा मञ्जु व अञ्जु राजाेपाध्यायपिन्सं यानादीगु खःसा उपाध्यायत्व कविन्द्र राजाेपाध्याय, उद्घात् ब्रह्मायणी पूजा ओम धरानन्द राजाेपाध्याय, प्रतिहर्ता सूब्रह्मण्य माहेश्वरी पूजा पुरुषाेत्तम राजाेपाध्याय, ब्रह्मा ब्रह्माणच्छासी काैमारी पूजा विजय शर्मा राजाेपाध्याय, ऋत्विज, याजक, वाग्यत मरुत वैष्णवी पूजा निरन ज्वालानन्द राजाेपाध्याय, आग्नीघ्र बाराही पूजा नरेन्द्र भालचन्द्र राजाेपाध्याय, प्रतिस्थाता, उन्नेता इन्द्रायणी पूजा रक्षण राजाेपाध्याय, नेष्टा चामुण्डा पूजा आकाश राजाेपाध्याय, अध्वर्यु भैरब पूजा आभास धरानन्द राजाेपाध्याय, सदस्पति सिंहिनी पूजा त्रिलाेचन राजाेपाध्याय, पाेता व्याघ्रिणी पूजा श्रीजय शर्मा राजाेपाध्याय, यजमान गंगायिनी पूजा राजु राजाेपाध्याय, बलि पूजा विक्रम कर्माचार्य व द्यः स्थापना पूजा दीनानाथ जाेशीपिन्सं यानादीगु खः।

पूजाया निंतिं व्यवस्थापन सराेज श्रेष्ठं यानादीगु खः। देगः नीगू लख तका तुकाः क्वचाःगु व उकिया निंतिं आपाःस्यां ग्वहालि याःगु निर्माण समितिया नायः सञ्जय महर्जनं धयादिल।

पुनर्निर्माणया ज्याय् पुरातत्त्वविद जयराम श्रेष्ठं नेतृत्व यानादीगु खः।