यलय् बुंद्यःया न्हवं  जुल

यलय् बुंद्यःया न्हवं  जुल


चैत २७ -  कोरोना भाइरसया संक्रमणया बिचा याना जुयाच्वंगु लकडाउनयात बिचा याना सिमित  मनूत जक  च्वना यलय् बुंद्यःया न्हवं  बिहिबाः  क्वचागु दु। दँय् दसं चोलागा पारूबलय् बुंद्यःया न्हवं  जुइगु परम्परा कथं लगनख्यःलय् द्यःया न्हवं जुगु खः । 

बिहिबाः न्हिनय् बुंगद्यःयात तःबाहालं खतय् तयाः पश्चिम ध्वाखां पित हयाः  लगंख्यःया न्हवंमण्डपय् यंकुगु खः। थथे याइबलय् बुंगद्यःया देगलय् ब्रम्हक्वं थापं याना तइ। न्हवंमण्डपय् बुंगद्यःयात साइतय् लाकाः प्यंगू दिशां प्यम्हेसिनं दुरु लखं महास्नान (न्हवं) लुइगु परम्परा दु। न्हवंया चान्हय् बुंगद्यःया शरीर मूति काहा पुइकाः सिथं यंकीसाः  न्हवं लिपा बुंगद्यःया मूर्तियात चाैलागाः पारुंनिसें सप्तमीतक देगलय् स्वथना तइ। अष्टमीनिसें एकादशीतकया दुने बुंगद्यःया स्यंगु ख्वाः ह्वनाः दयेकाः निभाः पाकीगु खः। द्यःया न्हवं स्वयेगु लागि यलया कुमारी माजुयात न विज्याकेमागु चलन दु ।

२०७७ सालया बुंगद्यःया जात्रा वइगु बैशाख १२ गते द्यःयात रथय् विज्याका १५ गतेनिसें शुरू जुइमाःगु धकाः पात्रोय् न्ह्यथनातगु दु । 

(किपाः रामराजा बज्राचार्य,नेपालमण्डल टेलिभिजन)