सनिलय् यायेमाःगु सिथि द्यःया न्हवं न्हिनय् जुल

सनिलय् यायेमाःगु सिथि द्यःया न्हवं न्हिनय् जुल
फाइल फोटो


जेठ १२ - येँया न्हूघः न्ह्यनेसं च्वंगु मण्डपय्  तछलाथ्व तृतिया  खुन्हू जुइमाःगु सिथी द्यःया न्हवं कोरोना संक्रमण पनेत लकडाउनया कारणं मयायेगु धकाः न्हापा धासाः न लिपा परम्परायात निरन्तता बिइगु लागि सनिलय्  यायेमागु न्हवं थाै न्हिनय् याःगु दु। सनिलय्  यायेमागु न्हवं थाै न्हिनय् मनूत म्वः म्वः मच्वसे यागु धका पत्रकार कुमार रंजितं जानकारी बियादिगु दु। 

थुगुसिइ लकडाउनया कारणं सिथिद्यःया न्हवं मयायेगु हे धकाः छुं दिं न्ह्यव हे सुचं पिथंगु खः। तर छुं नं सरकारी निकायलिसे स्वापू मदुगु सिथिद्यःया न्हवं पाःलाः विष्णु लाल श्रेष्ठया छेँजलं आकझाकां थःपिं जक च्वनाः मनू हूल मदयेक न्हिनय् हे अःपुक क्वचायेकूगु पत्रकार रंजितं धयादिल।

दँय् दँस थाैंया दिं कुमार, कार्तिकेयया नामं म्हस्यूम्ह महाद्यः व पार्वतीया तःधिकम्ह काय् सिथी द्यःयात सिथी नखःया प्यन्हु न्ह्यः द्यःछेँय् पितहयाः थसिया नेमकुल पान्जुपाखें पुजायाये धुंका धलिं लुइकेगु ज्या जुइगु खः । सादुरु व लः पाखें सिथिद्यःयात धलिं लुइकेगु ज्या क्वचाल कि चाैंथीनिसें लँपु छायेगु ज्या शुरु जुइ । सिथि नखः छन्हु न्ह्यः पंचमी खुन्हू अन हे च्वंगु द्यः फल्चाय् बहनी गुंगू कर्म पुजा राजोपाध्याय पाखें होम यानाः क्वचायेकीसाः  कन्हे कुन्हु अर्थात सिथिनखः खुन्हू  न्हिच्छि सर्वसाधारणया नितिं ब्वयातइ । सिथिनखः खुन्हू खुन्हू सिथि द्यःयात देगुद्यः भाः देपुजा मदुपिनी नं पुजा वया देपुजा भ्वय् न्यायेकी सा मदुपिनिगु आत्मां पुण्य संचय याये फयेमाः धकाः १०८ देवाः मत नं च्याकेगु ज्या जुइ । न्हापा न्हापा सिथि द्यःयात येँयाःया रुटय् थःने क्वने व किलाघलय् चाहिकेगु परम्परा दूगु खःसा स्वगू दशक न्ह्यः निसें थ्व परम्परा दिइधुक्कुगु दु।

न्हवंलिपा सिथि द्यःयात यायेमाःगु फुक्क धार्मिक ज्याखँ साधारण किसिमं निरन्तरता काइगु खनेदु।