ख्वपया नवदुर्गा भवानी सक्वय्

थौं सक्वया तलेजुइ न्या लाकेगु जात्रा जुइगु

ख्वपया नवदुर्गा भवानी सक्वय्
सामाजिक संजाल: THe Bhadgaunlezzz from khwopazz


माघ १९ - ख्वपया नवदुर्गा प्याखंयात प्यन्हुतक सक्वय् ल्हुइकेगु परम्परा कथं आः नवदुर्गा भवानीयात सक्वय् विज्याकातगु दु।

शुक्रबाः नवदुर्गा प्याखंयात ख्वपं सक्वय् विज्याकुगु खः। थौं सक्वया क्वाथय् च्वगु तलेजुइ न्या लाकेगु जात्रा जुइ। म्हिगः साल्खात्वालय् न्या लाकुगु पत्रकार पवनलाल श्रेष्ठं धयादिल । प्यन्हुतक प्याखं ल्हुइकाः न्यान्हु खुनु चाँगुइ यंकेगु चलन कथं कन्हय्ं सुथ न्हापां नवदुर्गा देवगणयातं चाँगुइ बिज्यांकिगु श्रेष्ठ धयादिल।

सक्वय् लच्छिन्यंक जुयाच्वंगु माधवनारायण स्वस्थानी धलं न्ह्याना च्वगु इलय् नवदुर्गा प्याखं ल्हुइकेमाःगु न्हापांनिसेंया हे चलन कथं थुगुसि नं नवदुर्गा प्याखं ल्हुइकूगु खः।न्या लाकेगु जात्राया झ्वलय् नवदुर्गा भवानी व माधव नारायणद्यःयात नापलाकेगु नं परम्परा दु। अथे द्यःतयत नापलाकिगु इलय् नवदुर्गा भवानीइ माधव नाराद्यःयात पासुकाः चिनाबिइगु परम्परा दु।

प्यन्हुतक सक्व च्व ज्वछि प्याखंया द्यःतयत सक्वया थी थी थासय् चाःहिकिगु खसाः साल्खात्वाः व तलेजु लिक्क याना निक्वः न्या लाकेगु धार्मिक विधि जूइगु खः ।