ख्वपया विद्यार्थी निकेतन स्कूलय् प्राचीन भग्नावशेषत लूत

ख्वपया विद्यार्थी निकेतन स्कूलय्  प्राचीन भग्नावशेषत लूत


कार्तिक ११ - विश्व सम्पदा धलखँय् तयातःगु प्राचीन ख्वप लाय्कु लागाय् दुगु छगू स्कुलय् थप प्राचीन भग्नावशेष लूगु दु।

ख्वप लाय्कु लागा, साकोथाय् सञ्चालन जुयाच्वंगु विद्यार्थी निकेतन माध्यमिक स्कूलया परिसरय् वासुदेव प्रसाद जोशी स्मृति भवनया न्ह्यनेया चौरय् लःया ट्याङ्की दयेकेत स्कूल प्रशासनं ७ फिटति गाःवंगु गाः म्हुगू खः। गालय् स्पष्ट रुपय् पुरातात्त्विक भग्नावशेष लुसेलिं पुरातात्त्विक अन्वेषणया न्हूगु हाथ्या थप जूगु दु।

लूगु भग्नावशेषय् तःतःपाःगु पक्की अपात, ल्वहँया फःलिसें अप्पा लानातःगु सतह स्पष्ट खनेदु। लूगु पुरातात्त्विक अवशेषतय्गु ख्वप नगरपालिकाया प्रमुख सुनील प्रजापति, उपप्रमुख रजनी जोशी लगायत थीथी पदाधिकारीलिसें सम्बन्धित विज्ञतय्सं निरीक्षण यायेधुकुंगु दु।

इतिहासय् ९९ चुकया वर्णन दुगु ख्वप लाय्कुदुने न्हापा थीथी कारणं यक्व ऐतिहासिक चुक व भवनत ल्हानावंगु दाबी इतिहासकारतय्सं यानावयाच्वंगु दु। वर्तमानय् थुगु लागाय् अप्वोखँय् १५ ति जक चुक अस्तित्वय् दु। भग्नावशेष लूगु ठासय् २००४ सालनिसें स्कूल सञ्चालनय् दुगु प्रमाण दु। तर स्कूलया मेमेगु थीथी भवनत धासाः लिपा तिनी दयेकूगु खः। 

प्राचीन ख्वप लाय्कु लागाय् अझं नं यक्व महत्त्वपूर्ण पुरातात्त्विक अवशेषत दयेमाःनिगु धासें अन व्यवस्थित रुपं  उत्खनन ज्या यायेमाःगुलिं पुरातत्वविद्तय्सं बः ब्यूगु दु।