मोहनीबलय् ख्वपया तलेजु देगलय् सामान्य पूजा जक जुइगु

मोहनीबलय् ख्वपया तलेजु देगलय् सामान्य पूजा जक जुइगु


असोज २०- ख्वपया तलेजु देगलय् थुगुसिया मोहनी बलय् बां मस्यासे सामान्य कथं पूजा जक यायेत ख्वप नगरपालिकां निर्देशन ब्यूगु दु। नगरपालिकाय् च्वंगु बैठकं लिपांगु इलय् कोरोना महामारीया जोखिम अन्त्य मजुनिगु व मनूत म्वःम्वः जुलकि थप जोखिम अप्वयेफू धासें थथे निर्णय याःगु खः।

बैठकं कोभिड–१९ या संक्रमण पाः जुसाः नं उकिया जोखिम दनिगुलिं  सामान्य कथं मोहनी हनेत व ख्वप तलेजुदुने जुइगु फुक्कं पूजाय् बां मस्यासें स्वास्थ्य सुरक्षा मापदण्ड नालाः पुजारीपाखें नित्य पूजा जक यायेगु व्यवस्था यानाः भीड मयासें भौतिक दूरी कायम यायेत अनुरोध याःगु खः।

नगरपालिकाया मेयर सुनिल प्रजापतिइ कोभिडया संक्रमण महामारीइ भीड मयासें, भौतिक दूरी कायम यानाः स्वास्थ्य सुरक्षा मापदण्ड नालाः नखः इनाप यानादिल।

ख्वपया प्रमुख जिल्ला अधिकारी रुद्रादेवी शर्मां नं नख हनेगु झ्वलय् कोभिड फैले जुइगु जोखिम यक्व दइगुलिं भौतिक दूरी कायम यायेत आह्वान यानादिल ।

ख्वपय् नलाःस्वने दिंनिसें चालंतक थीथी शक्तिपीठनापं धार्मिक ठासय्  मेला, पूजा व नवरात जुइगु परम्परा दु।