ख्वपय् जुगु दुर्घटनाय् सिम्ह मिसायात त्वःता बिस्यूवपिंन्त ज्वन

ख्वपय्  जुगु दुर्घटनाय् सिम्ह मिसायात त्वःता बिस्यूवपिंन्त ज्वन


मंसिर २१ - मध्यपुरथिमि नगरपालिका–३ कौशल्टारया ६ लेन सडकय् जुगु दुर्घटनाय् सिम्ह मिसायात त्वतावपिं स्वम्हसित प्रहरी ज्वंगु दु।

ख्वपं येँय् पाखें वयाच्वगु बा ८ च ४७५६ ल्याःया कार चान्हय्  १२:४५ ताइपाखें कौशलटारया सडकया नँयागु रेलिङ त्वथुला लँय् सिथय् च्वगु सिमेन्टया लठ्ठाय् न्याना फातापुगु खः। दुर्घटनाय् लाना कारय् दुम्ह येँय्  महानगरपालिका–४ धुम्बाराही पीपलबोटया ३० दँया रिया श्रेष्ठ सिगु प्रहरीइ धागु दु।

४ म्ह दुगु कार अनियन्त्रित जुया दुर्घटना जुगु प्रहरी परिसर ख्वपया प्रहरी नायब उपरीक्षक दीपक गिरीइ जानकारी बियादिल । घटनाबारे जानकारी वयेसातकि घटनास्थल थ्यना घाःपा जुम्ह श्रेष्ठयात वासःया  लागि मध्यपुर अस्पताल  थ्यकागु व अस्पतालय् थ्यबलय् चिकित्सकं श्रेष्ठ मदेधुक्कुगु धकाः जानकारी ब्यूगु वयकलं धयादिल ।

घटनालिपा बिस्यू वपिं कारया चालक मध्यपुरथिमि–१ लोकन्थलीया २६ दँया रञ्जित कार्कीयात प्रहरीइ नियन्त्रणय् कया अनुसन्धान यानाच्वंगु वयकलं धयादिल । अथेहे कारय् दुपिं मध्यपुरथिमि–५ राधेराधे च्वनिम्ह २६ दँया विजय देउजा व सूर्यविनायक नगरपालिका–४ दधीकोट गाम्चा च्वनिम्ह २७ दँया सुदीप थापायात घटनाबारे प्रहरीइ न्यनेकने यानाच्वगु दु।

दुर्घटनालिपा कारय् दुपिं थुपिं ३ म्ह श्रेष्ठया अवस्था स्वया सित धकाः अन हे त्वःता बिस्यू वगु प्रहरीइ धागु दु ।

दुर्घटना जुगु कार पूर्ण रूपं क्षति जुगु दु ।