नेपालय् बर्ड फ्लू सङ्क्रमण पुष्टि

नेपालय् बर्ड फ्लू सङ्क्रमण पुष्टि
फाइल फोटो


माघ १७ - नेपालय् बर्ड फ्लू खनेदुगु दु । येँया तारकेश्वर नगरपालिकाय् लहिनातःपिं टर्की व हेँयलय् बर्ड फ्लू पुष्टि जुगु पशु सेवा विभागं धागु दु ।

केन्द्रिय पशुपन्क्षी रोग अन्वेषण प्रयोगशालाय् याःगु रियल टाइम पीसीआर परीक्षणय् बर्ड फ्लू जुगु पुष्टि जुगु खः। बर्ड फ्लू पुष्टि जुसेलिइ उगु फार्म व जखलय् दुपिं १८५६ हेँय्, ६२२ बट्टाई, ३२ खाः, २५ टर्कीलिसें ५४२ खेँय् व  ७५ केजी दाना नष्ट यागु विभागं प्रेस विज्ञप्ती पिकया जानकारी ब्यूगु दु।

ल्वय् मेथाय् न्यकेमबिइत बर्ड फ्लू खनेदुगु लागाय् दुपिं फुक्कं लहिनातपिं झंग व ल्वय् पुनेफुगु मेमेगु वस्तुयात नष्ट याःगु विभागं धागु दु । ल्वय् खनेदुगु लागायात निसङ्क्रमण यायेधुक्कुगु नं विभागं धागु दु। विभागं नेपालय् बर्ड फ्लूया जोखिमयात बिचा याना रोग रोकथाम तथा नियन्त्रण सम्बद्ध निकायतयत सतर्क अवस्थाय् तगु धागु दु।

विभागं अनिवार्य रुपय् स्वास्थ्य परीक्षण याना भेटेरिनरी प्रमाणपत्र कया जक झंग व वलिसें सम्वन्धित उत्पादन उखेथुखे यायेत, फार्म परिसरय् जैविक सुरक्षाया विधि नालेत, फार्मयात नियमित रुपय् निसंक्रमण यायेत व छुं नं झंग बिरामी जुसाः पशु सेवाया निकायलय् सूचं बिइत विभागं इनाप याःगु दु। लच्छिति न्हय् भारतया थीथी ठासय् बर्ड फ्लू ल्वय् खनेदसेलिइ नेपालय्  सतर्कता अप्वयेकुगु खः।