८ क्वःखुसि बुद्धकृष्णं म्ये प्वाः खंकादिल

८ क्वःखुसि बुद्धकृष्णं म्ये प्वाः खंकादिल


बैशाख २ - बोडया बुद्धकृष्ण श्रेष्ठं ८ क्वःखुसि म्ये प्वाः खंकादिगु दु। मध्यपुरथिमि नगरपालिका बोडेय् दँय् दसं बैशाख २ गते हनिगु म्ये प्वाः खनिगु जात्राय् ४८ दँया बुद्धकृष्णं ८ क्वः खुसि म्ये प्वाः खंकादिगु खः।

तान्त्रिक विधि पूरा यानाः १० इन्च ताःहाकगु मुलुं वय्कया म्येय् प्वाः खंगु खः। कला संस्कृतिया संरक्षणया लागि म्ये प्वाः खंका जात्रायात निरन्तरता बियागु वय्कलं धयादिल। जात्राय् मध्यपुरथिमि बोडेया श्रेष्ठ थरं प्राचीन पाँचो गणेद्यःया देग न्ह्यने द्वःलद्वो मनूतयगु उपस्थितिइ म्ये प्वाः खंकिगु प्रचलन दु ।

म्ये प्वाः खंकुम्ह मनू नं अर्धचन्द्राकार महादीप क्वःबिया बोदेय् चाहिलाः महालक्ष्मी देगः चाहिलेधुक्कां मुलु लिकया महालक्ष्मी देगलय् तायाः देगःया चाः घालय् तइगु प्रचलन दु ।

आःतक १२ म्हसियां निरन्तर १०६ दँ तक म्ये प्वाः खंकेधुक्कुंगु दु। थ्वया न्हय्  विसं १९६९ निसें १९९० तक हर्कनरसिंह बासँ श्रेष्ठं २२ तक, विसं १९९१ निसें २०२२ तक बेखानारायण हाय श्रेष्ठं ३२ तक, २०२३ य् हरिदेव किला श्रेष्ठं छक, २०२४ निसें २०२६ तक हरि भासिंक श्रेष्ठं स्वक, २०२७ व २०२८ य् इन्द्र बाटा श्रेष्ठं निक,  २०२९ निसें २०३१ तक हर्केश्वर ब्याँ श्रेष्ठं स्वक, २०३२ निसें २०३८ तक चन्द्रसेन द्यों श्रेष्ठं न्ह्येक म्ये प्वाः खंकादिगु खः ।

अथेहे २०३९ निसें २०४६ तक दीलकुमार खपे श्रेष्ठं ७, २०४७ य् मुनि घों श्रेष्ठं, २०४८ य् धर्मराज बलाय श्रेष्ठं, २०४९ निसें २०६० तक कृष्णचन्द्र बाग श्रेष्ठं १२, बुद्धकृष्ण बाग श्रेष्ठं २०६१ निसें २०६४ तक व २०७३ निसें २०७५ तक ७ व जुजुभाई बासँ श्रेष्ठं २०६५ निसें २०७२ तक ८ म्ये प्वाः खंकादियाः जात्रायात निरन्तरता बियादिगु खः। 

थगुने कोभिड–१९ या कारणं जात्रा सञ्चालन जुइमफया इतिहासय् हे न्हापांखुसि दिउगु थ्व  जात्रां थुगुसिइ निरन्तरता कागु खः ।

बुद्धकृष्ण श्रेष्ठं मध्यपुरथिमि नगरपालिकां सञ्चालन याःगु नेपाल–कोरिया मैत्री नगरपालिका अस्पतालय् ताइलनिसें एम्बुलेन्स चालकया रूपय् कोरोना महामारीइ कोभिडया बिरामी जक ल्हइगु आइसोलेटेड एम्बुलेन्स चले याना  सङ्क्रमिततय्गु सेवा यानावयाच्वनादिगु दु।