बजेटय् दुगु छुं छुं लोकप्रिय ज्याझ्वःत

बजेटय् दुगु छुं छुं लोकप्रिय ज्याझ्वःत


जेठ १५  - सरकारं मतदातायात लय्तायेकेगु हिसाबं बजेट हयेत तयारी याःगु धासें  आलोचना जुयाच्वंगु इलय् सार्वजनिक जूगु बजेटय् यक्व लोकप्रिय ज्याझ्वःत दुथ्याकाः तगु दु ।

अध्यादेशमार्फत सार्वजनिक जूगु बजेटय् कोरोना रोकथाम व नियन्त्रणय् बः ब्यूगु दु । खोप न्यायेत व अस्पतालया पूर्वाधार थकायेत गाक्क धिबाः फ्यागु दु । कर्मचारीया तलब व ज्येष्ठ नागरिकया भत्ता अप्वयेकूगु दु। समग्रय् सरकारं वितरणमुखी बजेट दयेकूगु दु।

बजेटय् दुथ्याकगु छुं छुं लोकप्रिय ज्याझ्वः

सरकारी कर्मचारीया तलब थहाँवन

सरकारी कर्मचारीया तलब थकागु दु। सरकारं कर्मचारीया तलब २ द्वःतकाया दरं थकागु खः। थ्व तलब साउन १ गतेनिसें लागू जुइ । महंगीभत्ता यथावत तःगु अर्थमन्त्री विष्णुप्रसाद पौडेलं जानकारी बियादिल।

वृद्धभत्ता ः लच्छिया ४ द्वःतका

सरकारं वृद्धभत्ता थकागु दु। वइगु आर्थिक वर्षया बजेट प्रस्तुत यासें अर्थमन्त्री विष्णु पौडेलं आः वृद्धभत्ता मासिक ४ द्वःतका थ्यकुगु जानकारी बियादिगु खः। वय्कलं फुक्कं किसिमया सामाजिक सुरक्षा भत्ता ३३ प्रतिशतं थकागु जानकारी नं बियादिल ।

सरकारी कर्मचारीयात भत्ता बिया चाहिकं छ्वइगु

सरकारं आन्तरिक पर्यटन थकायेत सरकारी कर्मचारीयात चाहिकं छ्वइगु जूगु दु । वइगु बजेटय्  सरकारी कर्मचारीयात चाहिकं छ्वयेगु प्याकेज घोषणा जूगु खः । सरकारी कर्मचारीयात १० न्हूया पारिश्रमिक बराबरया चाह्यूवनेत धिबाः बिइगु बजेटय् न्ह्यथनातःगु दु। अथेहे विदेशी पर्यटकयात लच्छिया भिसा शुल्क छुट बिइगु जूगु दु।

सुरक्षाकर्मीया रासन भत्ता थहाँवन

सरकारं सुरक्षाकर्मीया रासन भत्ता थकागु दु । देशय्  शान्ति, सुरक्षा कायम यायेगु ज्याय् खटेजुपिं  नेपाल प्रहरी व सशस्त्र प्रहरीया एपीएफका कर्मचारीया रासन भत्ता १५ प्रतिशतं थकायेगु बजेटय् न्ह्यथनातःगु दु।

सरकारी अस्पतालय् पत्रकारया उपचार निःशुल्क

सरकारं पत्रकारतय्त ७ लखतकया दुर्घटना बिमाया व्यवस्था याःगु दु। थुकिया लागि ५० प्रतिशत प्रिमियम रकम सरकारं फइगु जूगु दु । सरकारं पत्रकारतय्त ७ लखतकया दुर्घटना बिमाया व्यवस्था याःगु दु। थुकिया लागि ५० प्रतिशत प्रिमियम रकम सरकारं फइगु जूगु दु ।  अर्थमन्त्री विष्णु पौडेलं श्रमजीवी पत्रकारतय्त निःशुल्क उपचारया व्यवस्था जूगु धयादिल। पत्रकार महासंघया दुजतय्त प्रेस काउन्सिलं जारी याःगु उपचार कार्डया आधारय् सरकारी अस्पतालय् निःशुल्क उपचारया व्यवस्था जूगु खः। ज्या मदयेका च्वनेमाःगु पत्रकारतयत सरकारं लेखनवृत्ति नं उपलब्ध याकिगु जूगु दु । अथेहे, सरकारं सञ्चारग्रामय् प्रेस संग्राहालय नं निर्माण याइगु जूगु दु।

शैक्षिक प्रमाणपत्र बरः तयाः २५ लख तकातक त्यासाः कायेफइगु

सरकारं शैक्षिक प्रमाणपत्र बरः तयाः २५ लख तकातक त्यासाः उपलब्ध याकिगु जूगु दु । वइगु आर्थिक वर्षया बजेट सार्वजनिक यासें अर्थ मन्त्री विष्णु पौडेलं स्नातक, स्नातकोत्तर वा वसिबें च्वय्याःगु शैक्षिक योग्यता कयातपिन्त थःम्ह प्राप्त याःगु शैक्षिक प्रमाणपत्र बरः तयाः अप्वोखँय् ५ प्रतिशत ब्याजदरय् त्यासाः उपलब्ध याकेगु जानकारी बियादिगु खः।

खोप कायेल्यदनिपिं फुक्कसित निःशुल्क खोप बिइगु

सरकारं कोरोना खोप खरिद व व्यवस्थापनया लागि २६ अर्ब ७५ करोड विनियोजन याःगु दु । अथेहे फुक्कंसित कोरोना भाइरसविरुद्धया खोप निःशुल्क उपलब्ध याकिगु जूगु दु । सरकारं भेन्टिलेटर व मेडिकल उपकरणया लागि ४ अर्ब फ्यागु मन्त्री पौडेलं धयादिल। अथेहे सरकारं पालिकाय् छ्वयेइगु बजेट रकम थकागु खः । कोरोनां सिइपिनिगु मस्तेत छात्रवृत्तिलिसें साना किसानयात साः व पुसाय् अनुदान बिइगु घोषणा नं याःगु दु । सरकारं गरिबी निवारण कोष व सांसद विकास कोष खारेज याःगु दु ।