सरकार गठन जूगु ८८ न्हूलिपा मन्त्रिपरिषद विस्तार

सरकार गठन जूगु ८८ न्हूलिपा मन्त्रिपरिषद विस्तार


असोज २२- सरकारया नेतृत्व काःगु ८८ न्हूलिपा प्रधानमन्त्री शेरबहादुर देउवां थाैं (शुक्रबाः) मन्त्रिपरिषद् विस्तार यानादीगु दु। कांग्रेस सभापति नं जुयादिम्ह देउवां प्रधानमन्त्रीया सपथ काःगु स्वलाति लिपा मन्त्रीपरिषद्यात पूर्णता बियादीगु खः।

असार २९ गतेय् सरकारया नेतृत्व कयादिम्ह देउवां थ्वया न्ह्य् किस्ता किस्ताय् यानाः ५ म्ह मन्त्री व छम्ह राज्यमन्त्री दयेकादीगु खः। वय्कलं मन्त्रीपरिषद्यात पूर्णता बिइमफूगु धासें गठबन्धनदलया नेता व कांग्रेसया हे शिर्ष नेतातयसं आलोचना याःगु खः।

देउवां थःगु पार्टी नेपाली काँग्रेसनापं, नेकपा माओवादी केन्द्र, नेकपा (एकीकृत समाजवादी) व जनता समाजवादी पार्टी (जसपा) यात दुथ्याकाः मन्त्रिपरिषद् विस्तार यानादीगु खः।

विहीबाः मन्त्रालय बाँडफाँडया खँ ज्यसेलिं थाैं मन्त्रिपरिषदयात पूर्णता ब्यूगु खः। सहमतिकथं नेपाली काँग्रेसं ८ मन्त्री व २ राज्यमन्त्री, माओवादी केन्द्रं ५ मन्त्री व छम्ह राज्यमन्त्री, नेकपा (एकीकृत समाजवादी) व जनता समाजवादी पार्टीं (जसपा) ४–४ मन्त्रालय कागु दु।

प्रधानमन्त्री देउवां कांग्रेसपाखें ज्ञानेन्द्रबहादुर कार्कीयात सञ्चार, सूचना तथा प्रविधि, दिलेन्द्र बडुयात कानुन न्याय तथा संसदीय मामिला, उमा रेग्मीयात महिला बालबालिका तथा ज्येष्ठ नागरिक, मिनेन्द्र रिजालयात रक्षा, उमाकान्त चौधरीयात खानेपानी मन्त्रालयया जिम्मेवारी बियादिगु दु।

प्रधानमन्त्री देउवां नेकपा माओवादी केन्द्रया देवेन्द्र पौडेलयात शिक्षा विज्ञान तथा प्रविधि, शशि श्रेष्ठयात भूमि व्यवस्था सहकारी तथा गरिबी निवारण, महेश्वर गहतराजयात युवा तथा खेलकुद मन्त्रालयया जिम्मेवारी बियादिगु दु।

अथेहे नेकपा एकिकृत समाजवादीपाखें रामकुमार झाँक्री संस्कृति पर्यटन तथा नागरिक उड्यनमन्त्री, कृष्णकुमार श्रेष्ठ श्रम रोजगार तथा सामाजिक सुरक्षामन्त्री, प्रेम आले सहरी विकासमन्त्री जुयादिगु दु। स्वास्थ्य तथा जनसंख्या मन्त्रालयया जिम्मेवारी विरोध खतिवडायात ब्यूगु दु। स्वास्थ्य राज्यमन्त्रीइ समाजवादीया भवानीप्रसाद खापुङ नियुक्त जुयादिगु दु ।

जनता समाजवादी पार्टी (जसपा) पाखें रेणु यादव भौतिक पूर्वाधार तथा यातायातमन्त्री, राजेन्द्र श्रेष्ठ संघीय मामिला तथा सामान्य प्रशासन, रामसहाय यादव वन तथा वातावरणमन्त्री व प्रमोद साह कृषि तथा पशुपन्छी विकासमन्त्री नियुक्त जुयादिगु दु।

कांग्रेसपाखें थ्वया न्हय् बालकृष्ण खाँण गृह, नारायण खड्का परराष्ट्रमन्त्री जुयादिइधुक्कुगु दु। माओवादीपाखें थ्वया न्हय् अर्थमन्त्रीइ जनार्दन शर्मा व ऊर्जामन्त्रीइ पम्फा भुसाल जुयादिइधुक्कुगु दु। स्वास्थ्य राज्यमन्त्री जुयादिम्ह उमेश श्रेष्ठयात प्रधानमन्त्री ज्याकुथिइ राज्यमन्त्रीया रुपय् साःगु दु।