मजिमगाःगु पुजा जक यायेगु याना बुंगद्यःया रथ सालेत खाका तयार

मजिमगाःगु पुजा जक यायेगु याना बुंगद्यःया रथ सालेत खाका तयार


भदाै ८ - कोरोना संक्रमणया कारण बुंगद्यःया रथजात्रा जुइमफया यलया पुच्वय् हे लानाच्वंगु दु। अप्वया वनाच्वंगु संक्रमणया जोखिमं याना रथजात्रा अनिश्चित जुयाच्वंगु इलय् रथयात्रालिसें स्वागू दुगु महत्वपूर्ण पुजा यायेगु कथं खाका तयार यागु दु।

असोज २ निसें पुरूषोत्तम महिना शुरू जुइगुलिइ रथयात्रा वइगु भदौ १६ गतेनिसें असोज २ गतेदुने क्वचायेकेमाःगु बाध्यता दुगुलिइ  बुंगद्यःया पानेजु, ज्योतिषी व सरोकारवालातयसं विधि जक पूंवकेगु याना रथजात्राया  लागि खाका तयार यागु खः।

रथ सालिगु रुटय्  जिल्ला प्रशासन ज्याकुपाखें कर्फ्यु , निषेधाज्ञा वा ५० मिटर जख सुं न मतयेगु व्यवस्था यायेमाःगु सुझानापं  मनूत म्वः म्वः मजुइकथं ,परम्परा, धर्म व सांस्कृतिक दृष्टिं मयासे मगाःगु पुजा जक यायेगु याना खाका तयार यानागु धकाः  दैवज्ञ ज्योतिषी कीर्तिमदन जोशीं धयादिल ।

न्हापा सनिलय् सालिगु रथ थुगुसिइ विशेष परिस्थितिया कारणं सुथय् सालेत खाकाय् प्रस्ताव यानातःगु दु । रथ साला गाबहालय् थ्यकेधुक्कां अन यायेमाःगु वैष्णवी द्यःया पुजा, बन्धुदत्त बज्राचार्यया सन्तानतयसं यायेमाःगु गुरुपुजा व बसुन्धरामाजुया पुजा जुइ धकाः वयकलं धयादिल। पुजा लिपा वखुन्ह् हे रथ साला लुँहितिइ थ्यकेगु लक्ष्य कयातःगु दु। रथयात बाघौति दिकाः मंगलय् मल्लजुजुपिंपाखें व्हखुखुसि छिकेगु पुजा याना लुँहिति थ्यकेगु धकाः वयकलं धयादिल। थुगुसिइ याकनं जात्रा क्वचायेमाःगुलिइ न्हापां गाबहालं  मंग जुकाः २ न्हू बिका रथ लुँहिति थ्यकावयाच्वगुलिइ थुगुसिइ छन्हू हे अन थ्यकेगु लक्ष्य कयातःगु दु ।

रथ लुँहितिइ थ्यकाः बाराहीतयगु पुजा व स्वस्ति होम याना कन्हय् खुन्हू  लगनख्यःपाखें सालेगु धयातःगु दु । न्हापा जुसाः लुँहितिइ रथ थ्यगु ३ निसें ४ न्हूदुने सालाः लगनख्यलय् थ्यकावयाच्वंगु  खः। रथ लगनख्यः थ्यगु दिं बुधबाः वा एकादशी मलासाः वखुन्हू हे चान्हय् बौ बिइगु धयातगु दु। अनंलिपा सुथय्  रथ साला  थतित्वालय् थ्यका बाराहीतयगु द्यःपुजा व रथ जावलाखेलय् सालेगु साइत स्वयेगु धयातगु दु।

अथेहे परम्परा कथं कीपूलिइ बुंगद्यःया प्रसाद बिइके छ्वइगु व साईतय् रथ जावलाख्यःपाखें सालेगु धयातगु दु । उकिया ४ न्हू लिपा बुंगद्यःयात रथं कुहाँविज्याका  बुंगय् यंकेगु धकाः खाकाय् न्ह्यथनातगु दु ।

यक्व मनूत म्वः म्वः जुइगु छ्वयलाभू, भुज्या, नैक्यालं लुइगु व भोटो क्यनिगु जात्रा मयासें धार्मिक विधिकथं मयासें मगाःगु पुजा जक यायेगु याना खाका तयार यानागु धका पानेजु कपिल बज्राचार्यं धयादिल।

खाकाय् रथ सालेगु लागि ९० निसें १०० म्ह मनूयात स्वीकृति बिइगु व रथ सालिपिन्सं थःगु स्वास्थ्य मापदण्ड फुक्कं  पुरा याना रथ सालिइगु न्ह्यथनातःगु दु ।

स्वास्थ्य सुरक्षाया लागि माःगु मास्क, सेनिटाइजर व पञ्जाया व्यवस्थापनया लागि यल महानगरपालिकायात इनाप यायेगु दैवज्ञ जोशीइ धयादिल । अथेहे रथ सालिगु रुटय् मतया तार मिले यायेगु, सडक मर्मत यायेगु ज्याया समन्वय महानगरपालिका याइसाः रथ सालेत माःगु जिन्सी व मेमेगु हलंज्वलं ताःलाकेगु जिम्मा गुठी संस्थानं याइगु धयातगु दु।अथेहे शान्तिसुरक्षाया फुक्कं व्यवस्था जिल्ला प्रशासनं मिले यायेत धायेगु धकाः वयकलं धयादिल ।

थुगु खाका कथं रथजात्रा यायेत राष्ट्रपति विद्यादेवी भण्डारी, प्रधानमन्त्री केपी शर्मा ओली, गुठी संस्थान केन्द्रीय ज्याकुलिसें यल कचा, जिल्ला प्रशासन ज्याकु यल, यल महानगरपालिका लगायत  थीथी निकाययात पत्राचार यायेधुनागु धकाः  दैवज्ञ. ज्योतिषी जोशीं धयादिल।

वंगु चैत २७ गते बुंगद्यःया न्हवंलिपा बैशाख १२ गते रथय् विज्याकेमाःगुलिइ कोरोना संक्रमण याना वंगु साउन १० गते बुंगद्यःयात रथय् विज्याकुगु खः।