एटिएम मेशिन ह्याक यानाःच्वम्हचिनियाँ नागरिकयात थुकथं ज्वन

एटिएम मेशिन ह्याक यानाःच्वम्हचिनियाँ नागरिकयात थुकथं ज्वन


चैत २० - येँय् महानगरपालिका–२७ या ज्याठाया तयातःगु मेगा बैङ्कया एटीएम बुथय् छम्ह चिनियाँ नागरिक दुहाँवन । तर,अनं वं कार्ड तया धिबाः लिमकासें ताचाः लिकया मेशिन हे चायेकेगु ज्या शुरू यात ।

थुखे, चिनियाँ नागरिकं एटीएम मेशिन चायेकेगु शुरू याये सातकि  सीसी क्यामेरा स्वयाच्वंम्ह बैङ्कया सुरक्षा गार्डं महानगरीय प्रहरी वृत दरबारमार्गय्  फोन यानाः विदेशी नागरिकं एटीएम लुटे यानाच्वंन धकाः जानकारी बिल।

महानगरीय प्रहरी वृत दरबारमार्गया डिएसपी रामेश्वर पौडेल व महानगरीय प्रहरी परिसर येँया डिएसपी राजकुमार केसी तत्काल घटनास्थलय् थ्यकंवन। अबलें २९ दँया चिनियाँ नागरिक वाङ जियाओलो एटीएम मेशिनया सिरियल नम्बरया फोटो कयाच्वंगु जुयाच्वन। जियोओलोयात प्रहरीइ ज्वन। मेशिन चायेकेगु ताचाःया बारे प्रहरीइ न्यःबलय् वं धाल, ‘चीनं ताचां ज्वनावयागु, तांचा तयेसातकि मेशिन चाल, तर फोटो छ्वये धासाः मलात ।’

धिबाः लिकायेगु सिबें सिरियल नम्बरया फोटो चीनय् छवयेगु हे वंयागु मुख्य उद्देश्य खनेदुगु महानगरीय प्रहरी परिसर येँय्या एसएसपी अशोक सिंहं धयादिल। वयकया कथं नक्कली ताचा गथे याना दयेकल, थुकियात कया अनुसन्धान जुयाच्वगु दु।

चीनं नेपाल वगु इलय् विमानस्थलय् पासां थःयात ६५ डलर धिबाः व तांचा ब्यूगु  जियाओलों प्रहरीयात बयानय् धागु दु। एटीएमया सिरियल नम्बर सहितया फोटो कया छ्वया हजि धकाः धागु दु धकाः प्रहरीलिसेंया बयानय् जियोओलों धागु दु। वंगु चैत १६ य् नेपाः वम्ह जियोओलों थन कुहाँवयेसातकि न्हापांगु एटीएमय् ताचांः तया चायेकेत स्वःबलय् मचासेंलिइ मेगुलिइ कुत याःगु जुयाच्वन।

जियोओलोलिसें लुगु ताचां एटीएम मेशिन चायेका धिबाः लिकायेधुक्कां पुलांगु हे अवस्थाय् लक यायेफुगु प्रहरीया धापू दु।

मेशिनया सिरियल नम्बरया फोटो कया चीन छ्वयेगु वाङया मुख्य उद्देश्य जूगु अनुसन्धानय् संलग्न प्रहरी अधिकारीतयगु निष्कर्ष दु। २ न्हूया लागी जक नेपाल वम्ह वं ड्रिल मेशिन नं ज्वना वगु दु। भिजिट भिसाय् वम्हसियां छाय् ड्रिल मेशिन हल धकाः नं प्रहरीं अनुसन्धान यानाच्वंगु दु।

वाङयाके दुगु २ प्रकारया १० कार्ड प्रहरीइ बरामद याःगु दु। उगु कार्डय् गज्याःगु डाटा दु धकाः परिक्षण जुयाच्वगु प्रहरीइ धागु दु ।

ठमेलया सञ्चयकोष ल्यूने च्वंगु होटल मन्टेशया कोठा नम्बर–४०५ जियोओलों अनलाइनं बुक याःगु प्रहरीइ धागु दु। येँय् कुहाँवयेसातकि होटलय् सामान तयेसातकि एटीएम बुथय् थ्यकवम्ह जियोओलोयात आः टेकुइ येँय् प्रहरीया हिरासतय् तयातःगु दु।