थनिनिसें कोरोनाविरुद्धया चिनियाँ खोप बिइगु सुरु

थनिनिसें कोरोनाविरुद्धया चिनियाँ खोप बिइगु सुरु


चैत २५  सरकारं बुधबाःनिसें चीनया अनुदानय् वगु  ८ लख डोज कोभिडविरुद्धया खोप ‘भेरोसेल’ बिइगु सुरु याःगु दु।

स्वास्थ्य तथा जनसंख्या मन्त्रालयं उगु खोप १८ निसें ५९ दँ उमेर समूहया मनूतय्त बिइगु धागु दु। बुधबाः येँया बानेश्वरय् दुगु नागरिक अस्पतालय् नेपाःया लागि चिनियाँ राजदूत होउ यान्छीइ उगु कोरोनाविरुद्धया खोप लःल्हानादिगु खःसाः अनंलिपा खोप बिइगु सुरु याःगु खः।

स्वास्थ्य मन्त्रालयया कथं थ्व खोप स्वनिगः लिसें काभ्रे, सिन्धुपाल्चोक, नुवाकोट व रसुवा याना ७ जिल्लाया २३ ठासय् जक बिइगु जूगु दु। २ डोज कायेमाःगुलिं थ्व अभियानय् ४ लखसियां जक खोप कायेखनिइ। महाशाखाया कथं थ्व खोप १८ निसें ५९ दँ उमेर समूहया प्राध्यापकत, चीनय् छात्रवृत्तिइ ब्वनाच्वंपिं ब्वमित, चीनय् अध्ययन यायेत वनेत्यपिं मनूत, हिमालय पार व्यापार याइपिं नेपाली व्यापारीतयसं कायेखनिइ।

अथेहे अत्यावश्यक सेवाय् ज्या याइपिं कर्मचारी, होटल ट्रेकिङ, विज्ञापन व इन्टरनेट लागाय् ज्या याइपिं मनूत, वासः, फलफुल, तरकारी लगायतया व्यापारीतयसं नं खोप कायेखनिगु धागु दु।