स्वनिगः रेड जोनय्

स्वनिगः रेड जोनय्


साउन ३२ - कोरोना संक्रमितया ल्याः न्हिया न्हिथं अप्वसेलिं स्वनिगलय् निषेधाज्ञायात थप कडा यायेत तयारी याःगु दु। स्वास्थ्यलिसें सम्बन्धित निकायं स्वनिगःयात ‘रेड जोन’ य् तःगु धासें स्वनिगःया ३ गुलिं जिल्ला येँय् , यल व ख्वपया प्रशासन ज्याकूथिइ जारी निषेधाज्ञायात थप कडा यायेत तयारी याःगु खः।

येँय्या प्रमुख जिल्ला अधिकारी कालीप्रसाद पराजुलीइ स्वास्थ्यलिसें सम्बन्धित निकायं स्वनिगःयात कोरोनाया रेड जोन कथं काःगु व संक्रमितया ल्याः नं अप्वयाच्वगुलिं निषेधाज्ञाया मोडालिटीइ नं थप कडा यायेमाःगु अवस्था ब्वलनावगु धयादिल।

वय्कलं मनूतय्सं सरकारं जारी याःगु स्वास्थ्य सुरक्षा मापदण्डया पालनाय् च्यूता मक्यगुलिं नं संक्रमणया गति थहाँवगुलिं अवस्थाया विश्लेषण यायेगु ज्या जुयाच्वंगु धयादिल ।

स्वास्थ्य मन्त्रालयया कथं म्हिगःतक येँय् ८,४३०, यलय् १९७० व ख्वपय् १३८६ संक्रिय संक्रमित दु।म्हिगः स्वनिगलय् ७३७ म्हसिके कोरोना भाइरसया संक्रमण पुष्टि जूगु खः। मन्त्रालयया कथं म्हिगः येँय् ५२२ म्ह, ख्वपय्  ६३ म्ह व यलय् १५४ म्ह कोरोना संक्रमित थप जूगु खः। येँय् परीक्षण याःगुमध्ये २५ निसें ३० प्रतिशतयात संक्रमण पुष्टि जुयाच्वंगु दु।

थुथाय् प्रशासनं बहनी ८ ताःनिसें सवारी साधन सञ्चालनय् रोक तयेधुक्कुगु दु। बहनीया इलय् मनूत नाप लाइगु ज्या यक्वः जुगुलिं प्रशासनं थथे निर्णय यानागु धागु दु।

थुथाय् कोरोना संक्रमणया गति अप्वयावंगुलिं स्वनिगःया निजी व सरकारी अस्पतालय् कोरोना संक्रमित बिरामी नं अप्वगु दुसाः संक्रमितया ल्याःलिसें मृत्युदर नं अप्वयावंगु दु ।

थ्वया न्हय् स्वनिगःया प्रमुख जिल्ला अधिकारीतय्गु मंकाः बैठकं निषेधाज्ञा  भदौ ८ तक कायम यायेगु निर्णय याःगु खःसाः स्वनिगलय् वंगु बैशाख १६ निसें निषेधाज्ञा तयातःगु खः ।