क्षेत्रपाटी निःशुल्क चिकित्सालयय् थनिनिसें विशेष कोभिड अस्पताल सञ्चालन

क्षेत्रपाटी निःशुल्क चिकित्सालयय् थनिनिसें विशेष कोभिड अस्पताल सञ्चालन


जेठ १२ - येँय्या क्षेत्रपाटी निःशुल्क चिकित्सालयय् थनिनिसें विशेष कोभिड अस्पताल सञ्चालनय् वगु दु। विशेष कोभिड अस्पताल येँय् महानगरपालिकायाया ग्वाहालि संचालनय् वगु खः।  

सहरी विकास राज्यमन्त्री रामवीर मानन्धर व महानगरया मेयर विद्यासुन्दर शाक्यं मंकाः कथं था अस्पताल सञ्चालन शुभारम्भ यानादिगु खः। थ्वलिसें क्षेत्रपाटी अस्पतालय् ७  आइसीयू, ४ भेन्टिलेटर, ६  एचडीयूनापं ३५ वेडया कोविड अस्पताल सञ्चालन जूगु खः।

अस्पतालया लागि येँय् महानगरं पूर्वाधार सुधारया छक्कलं ३० लख ३४ द्वः  ७३५ तका व लय् लय् पतिकं सञ्चालन खर्चवापत् ४८ लख १६ द्वः ६५७ तका फय्इगु जूगु दु। थुकिया लागि वंगु बैशाख ३१ गते सम्झौता जूगु खःसाः थ्व  सम्झौता महानगरं मेगु निर्णय मयातलेंया लागि कायम जुइ। महानगरयात ल्हासा शहरं ब्यूगु भेन्टिलेटरमध्ये २ गः छत्रपाटी चिकित्सालययात ब्यूगु दुसाः अस्पतालं न्याइगु थप ३ गः भेन्टिलेटरया धिबाः महानगरं पुलाबिइगु जूगु दु।

अस्पतालया क्षमता थकयाः कोभिड संक्रमणय् लापिं बिरामीयात सहज उपचारया वातावरण दयेकेत महानगरं सरकारी व सामुदायिक अस्पताललिसें सहकार्य याःगु धासें महानगरया प्रमुख विद्यासुन्दर शाक्यं थुथाय् जनताया जीवन रक्षाया माःगु फुक्कं कथंया ज्यायात प्राथमिकताय् तगु धयादिल।

महानगरं अस्पतालतयगु मागकथं थीथी मितिइ १२ अस्पताललिसें सम्झौता याःगु खः।

अथेहे महानगरं ८८ अक्सिजननापं २०० वेडया राधास्वामी कोविड आइसोलेसन लिसें अक्सिजन थेरापी सेन्टर, नरदेवी आयुर्वेद अस्पतालय् २५ वेडया एचडीयू व २५ वेडया यानाः  ५० वेडया आइसोलेसन सञ्चालनय् हयेधुक्कुंगु दु। अथेहे थी अस्पतालतय्त ४२ भेन्टिलेटर, ५० मोनिटर, १० कन्टिन्युअस पोजेटिभ एअर प्रेसर थेरापी मेसिन (सी प्याप), १० वाइलेवल पोजेटिभ एअरवे प्रेसर मेसिन (वी—प्याप) नापं उपकरण जडान यायेत्यगु दु। अथेहे अस्पतालया भौतिक सुधारया क्षेत्रय् नं ज्या जुयाच्वंगु दु।