नेपालय् डेल्टा प्रजातिया न्हूगु म्युटेन्ट लुत, थप सतर्क जुइत मन्त्रालयया इनाप

नेपालय् डेल्टा प्रजातिया न्हूगु म्युटेन्ट लुत, थप सतर्क जुइत मन्त्रालयया इनाप


साउन १२ - नेपालय् कोभिड-१९ या डेल्टा प्रजातिया मेगु न्हूगु उत्परिवर्तन पुष्टि जूगु दु।

स्वास्थ्य मन्त्रालयं मंगलबाः विज्ञप्ति पिकया परीक्षण याःगु ४७ नमुनाय् डेल्टा भेरिएन्ट पुष्टि जूगु व ३ गुलिं डेल्टाया न्हूगु म्युटेन्ट पुष्टि जूगु धागु खः।

पुष्टि जूगु ३ न्हूगु डेल्टा म्युटेन्टया नां एवाइवान तःगु दु। मन्त्रालयया सह प्रवक्ता डा समीर अधिकारीइ विज्ञप्ति जारी यासें जेठ मध्यनिसें असार मसान्ततक देय्या थीथी ठाय् व उमेर समूहया व्यक्तिपाखें काःगु नमुनाया परीक्षण याःबलय् म्युटेन्ट पुष्टि जूगु धागु खः।

लुगु भेरिएन्ट व म्युटेन्टत यक्व संक्रामक व फुक्कं उमेर समूहयापिन्त असर याइगु खनेदुगु नं मन्त्रालयं धागु दु।

भाइरसया न्हूगु उत्परिवर्तनलिसें जनस्वास्थ्यया मापदण्डयात कडा यानाः पालना यायेत नं मन्त्रालयं इनाप याःगु दु। मन्त्रालयं सम्भावित स्वगूगु लहरया चुनौतिपूर्ण अवस्थाया तयारी यायेत नं इनाप याःगु दु।

विश्व स्वास्थ्य संगठनं भेरिएन्ट अफ कन्सर्नया रुपय् अल्फा व डेल्टायात तगु दुसाः भेरिएन्ट अफ इन्ट्रेस्टया रुपय् कप्पायात तःगु दु। भेरिएन्ट अफ कन्सर्नयात संक्रामक भाइरस कथं कयातःगु दु।