नेपाःयात कोभ्याक्सं फाइजर व मोर्डना खोप बिइगु, मस्तेसं नं कायेखनिगु

नेपाःयात कोभ्याक्सं फाइजर व मोर्डना खोप बिइगु, मस्तेसं नं कायेखनिगु


साउन ११ - कोभ्याससुविधां नेपाःयात फाइजर व मोर्डना खोप नं बिइगु जूगु दु । स्वास्थ्य तथा जनसंख्या मन्त्रालयया नीति योजना तथा अनुगमन महाशाखाया प्रमुख डा. गुणराज लोहनीइ असोजनिसें चैततक ३ करोड २३ लख डोज खोप वइगु जानकारी बियादिल।  

सोमबार प्रतिनिधि सभाया शिक्षा तथा स्वास्थ्य समितिइ कोभिड - १९ संक्रमण रोकथाम तथा नियन्त्रणया लागि सरकारं यानाच्वंगु ज्याया ब्रिफिङ यासें वयकलं चैततक कोरोनाविरुद्धया ४ करोडं मल्याकं डोज खोप वइगु प्रक्षेपण जूगु जानकारी बियादिल। 
वय्कलं खोप कायेछिंगु फुक्कं उमेरयापिन्त गाक्कं चैततक ४ करोड २८ लख ४८ द्वः डोज खोप थ्यनिगु अनुमान जूगु धयादिल। 

वय्कलं असोजतक कोभ्याक्ससुविधा, वैदेशिक अनुदान व न्यानाः १ करोड ५ लख ४८ द्वः डोज खोप वइगु धयादिल। कोभ्याक्स सुविधाअन्तर्गत जापानं १६ लख डोज एषे्ट्रेजेनेका खोप भदौया न्हापांगु वाःतकया दुने थ्यनिगु लोहनीइ धयादिल। वैदेशिक सहायता अन्तर्गत चीन सरकारपाखें १६ लख डोज खोप साउन अन्तिम वालय् तक नेपाः लोहनीइ धयादिल । 

कोभ्याक्सपाखें १ करोड १३ लख डोज निःशुल्क वइगु धासें वय्कलं कोभ्याक्सपाखें कोभिसिल्ड, मोडर्ना, फाइजर, जोन्सन, सिनोभ्याक्स लगायत यानाः १ करोड ५० लख डोज खोप वइगु जानकारी बियादिल। अथेहे असोजनिसें चैततकय् मस्तेगु लागि ६० लख डोज फाइजर खोप नं उपलब्ध जुइगु वय्कलं धयादिल । 

सरकारं चैततक २ करोड ६५ लख जनसंख्यायात खोप बिइगु लक्ष्य काःगु दु। आःतक नेपालय् १४ लख ३० द्वः  ४०० नागरिकं पूर्ण व ३४ लख ५ द्वः १५४ म्हसियां न्हापांगु डोज खोप काःगु दु ।

आःतक नेपालय् कोभिशिल्ड, भेरोसिल व जोन्सनया खोप प्रयोगय् वगु खः।