कोभ्याक्समार्फत नेपालं मोडर्नाया ४० लख खोप प्राप्त याइगु

कोभ्याक्समार्फत नेपालं मोडर्नाया ४० लख खोप प्राप्त याइगु


साउन २९ -  नेपालं कोभ्याक्समार्फत मोडर्नाया ४० लख काेराेनाविरुद्धया खोप काइगु जूगु दु । कोभ्याक्सलिसेंया लागत साझेदारीमार्फत विश्व बैंकया वित्तीय ग्वाहालिइ मोर्डना खोपया ४० लख मात्रा न्यायेत गाभीलिसें सम्झौता याइगु नेपाल विश्वया हे निगूगु देय् जूगु दु।

नेपाःया लागि सुरक्षित व प्रभावकारी खोप हयेत सम्झौता यायेत ताःलागु स्वास्थ्य तथा जनसङ्ख्या राज्यमन्त्री उमेश श्रेष्ठं धयादिल । खोप सन् २०२२ या मार्चतकया दुने वइगु भलसाः काःगु दु।

थुकिइ नेपाःया ७२ प्रतिशत जनसङ्ख्यानापं १२ निसें १७ दँ उमेर समूहयात खोप बिइगु नेपाःया लक्ष्य हासिल यायेत ग्वाहालि याइगु राज्यमन्त्री श्रेष्ठया धापू दु । नेपाःया आपत्कालीन स्वास्थ्य क्षेत्रया माग पूवंकेत खोपं ग्वाहालि याइगु माल्दिभ्स, नेपाल लिसें  श्रीलङ्काया लागि विश्व बैंकया राष्ट्रिय निर्देशक फारिस हदाद जर्भोसं विश्वास प्वंकादिल ।

महामारीविरुद्धया स्वास्थ्य प्रतिकार्यया लागि विश्व बैंकं १०४ मिलियन डलर उपलब्ध यायेधुक्कुंगु द । गुकिंअन्तर्गत कोरोनाविरुद्धया खोप न्यायेगु व विस्तारया लागि ६७ दशमलव ५ मिलियन डलर विनियोजन याःगु दु।

विश्व बैंकं खोप न्यायेत व वितरण यायेत ५० लिं मल्याकं  कम व मध्यम आय दुगु देय्तय् ग्वाहालि यानाच्वंगु दु ।