लक्षित पुचयात खोप मगात, आः त्वःफ्यूपिन्त मेगु चरणय् दुथ्याकिगु

लक्षित पुचयात खोप मगात, आः त्वःफ्यूपिन्त मेगु चरणय् दुथ्याकिगु


जेठ २८ - स्वास्थ्य मन्त्रालयं आः भेरोसेल खोप कायेत त्वःफ्यूपिं ६० निसें ६४ दँया नागरिकयात मेगु चरणय् दुथ्याकेगु धागु दु।  

चीनं अनुदानय् वगु १० लख डोज भेरोसेल खोप ६० निसें ६४ दँया उमेर पुचया फुक्कंसित बिइगु धासाः नं खोपया अभाव जुगुलिं अथे यायेमफुगु मन्त्रालयं धागु खः। खोप केन्द्रय् लक्षित पुच बाहेकया मनूत नं खोप कायेत पाः च्वसेलिं इमित नं खोप बिइत बाध्य जूगु स्वास्थ्यकःमीतयसं धागु दु। थुकिइ याना यक्व ठासय् लक्षित पुचलं खोप कायेत मखंगु खः। अथेहे, गुलिखे ठासय् धासाः लक्षित पुचयात गाक्कं खोप छ्वयेमफुगुलिं नं क्वःछिउगु उमेर पुचया नागरिकतयसं खोप कायेमखंगु खः।

स्वास्थ्य मन्त्रालयं चीनं वगु १० लख डोज खोप ६० निसें ६४ दँया फुक्कं नागरिकयात मगाइगु जुसेलिं अन्तिम इलय् उमेर समूह परिवर्तन याःगु खः। स्वनिगलय्  ६० निसें ६४ दँ व स्वनिगःपिनेया लागि ६२ निसें ६४ दँ उमेर समूह क्वःछिउगु खः ।  स्वास्थ्य मन्त्रालयं निगूगु डोज बिइत गाक्क खोपया सुनिश्चितता याना जक न्हापांगु डोज ७७  गु जिल्लाय् छ्वगु खः। थुकिइ यानाः न्हापांगु डोजया लागि माग वसाः नं खोप छ्वये फइगु अवस्था मदुगु खोप शाखाया प्रमुख डाक्टर झलक शर्मा गौतमं धयादिल। आः न्हापांगु डोज कापिन्त २८ न्हू लिपा निगूगु डोज बिइगु जूगु दु। आः त्वफिउपिन्त खोप वलकि बिइगु धकाः गौतमं धयादिल। आः खोप काये त्वफिउपिनिगु तथ्याङ संकलन याना इमित लिपा बिइगु वयकलं धयादिल।

सरकारं खोप न्यायेत अमेरिका, रुस, बेलायत लगायत थीथी देयलिसें पहल यासाः नं खोप वइगुबारे अझ खँ क्वःमज्यूनिइ।

थ्वहे दथुइ, खोप अभाव जुसेलिं येँय् महानगरपालिकाय् खोप ज्याझ्वः स्थगित जूगु दु । खोप अभाव जुसेलिं महानगरया ३२ गुलिं वडाय् जुयाच्वंगु खोप ज्याझवः स्थगित जूगु खः ।