मोहनीया झ्वलय् यल लायकुलिइ जुइगु फुक्कं धार्मिक ज्याखँ पुजाय् जक सिमित याइगु

मोहनीया झ्वलय् यल लायकुलिइ जुइगु फुक्कं धार्मिक ज्याखँ पुजाय् जक सिमित याइगु
फाइल किपाः


असोज २१ - मोहनीया नखया झ्वलय् यल लायकुलिइ जुइगु फुक्कं धार्मिक ज्याखँयात परम्परानिसें न्ह्यानावयाच्वगु पुजाय् जक सिमित याइगु जुगु दु।

यल महानगरपालिकाया सरोकारवाला गुठीयारतलिसें च्वंगु बैठकं कोभिड–१९ महामारी रोकथाम यायेत सरकारं याःगु निर्णययात ध्यानय् धया थज्याःगु निर्णय याःगु धकाः महानगरपालिकाया प्रवक्ता राजु महर्जनं धयादिगु दु। लायकुलिइ मोहनीया झ्वलय् जुइगु  सांस्कृतिक बाजंनापया उत्सव, मानमानेश्वरी द्यःया पायो जात्रा , थेचोया नवदुर्गा प्याखं गथु प्याखं, गं प्याखं  थज्याःगु मनूत म्वः म्वः जुइगु सांस्कृतिक गतिविधि स्थगित जुइगु जुगु वयकलं धयादिल। जात्रालिसें सम्बन्धित मू गुठीयारत च्वना परम्परिनिसें विधिवत रुपय् यानावयाच्वगु  पूजाविधियात जक निरन्तरता बिइगु निर्णय जुगु दु।

बैठकय् यल  गुथी संस्थान , वडाध्यक्ष, थेचो नवदुर्गा प्याखं, यल लायकुलिइ च्वंगु मू छेँ, गंप्याखं, च्यासःया बाजं खलः, नाय: खि बाजं खलः  लगायतया ब्वति दुगु खः ।