थौं कौलाथ्व: दशमी, चालं

थौं कौलाथ्व: दशमी, चालं


असोज २९ - थौं कौलाथ्व: दशमी, देय्‌न्यंक थकालिपिनिगु ल्हातं सिन्ह: फया: चालं व बिजयादशमी हनाच्वंगु दु।

वंगु पारूखुनु प्यूगु न:लास्वां थौं क्वकया: थकालीया ल्हातं फयाकाय्‌गु चलन दु। थौंया दिनय् नेवा:तयसं विशेषरूपं मोहनि सिन्ह: ती। चिकंमत च्याका: सलिखय् उकिया कुँ गाका: हाकुगु व भुयूसिन्ह: नापं तीगु नेवा:तयगु मौलिक परम्परा दु। मोहनि सिन्हलं मभिंगु तत्वपाखें रक्षा याइगु विश्वास दु।

नेवा: परम्परा कथं नवरथ वनेगु नं थनिंनिसें क्वचा:गु दु। थौं गुह्येश्वरीया शान्त तीर्थय् वना: सोमशिखि नागराजया पुजा यात। वंगु न:लास्वनेगु दिनंनिसें नवरथ वनेगु सुरु जूगु ख:। अथेहे, म्हीग थापं खुनु पुज्यानात:गु ज्याभ: क्वकया: चालं यानाच्वंगु दु। येँय् असनय् च्वंपिनि धा:सा कन्हय् जक चालं यायगु चलन दु।