संक्रमणया जोखिम दतलें स्कुलय् शुल्क मकायेगु व्यवस्था याकेत निर्देशन (भिडियो)

ब्वमि भर्ना, जाँच व ब्वकेज्या मयायेत नं निर्देशन



बैशाख २५- प्रतिनिधिसभाया शिक्षा तथा स्वास्थ्य समितिं कोरोना संक्रमणया जोखिम कायम दतलें स्कुलय् शुल्क मकायेत व ब्वकेज्या मयायेगु व्यवस्था याकेत सरकारयात निर्देशन बिउगु दु । सिंहदरबारय् बुधबाः च्वंगु समिति बैठकं कोरोना महामारीया बांलाक्क आकलन मयासें ब्वमितयगु जाँच व भर्ना मकायेत, शुल्क मकायेत व औपचारिक रुपय् ब्वकेगु व्यवस्था मयायेत निर्देशन बिउगु खः ।

कोरोना भाइरसया महामारीया कारण थुथाय् स्कुल बन्द जुगु दु । तर शहरी क्षेत्रया गुलिखे स्कुलं ब्वकाच्वंगु जानकारी वगुलिइ अज्याःगु गतिविधि पनेत निर्देशन बियागु धकाः समिति सभापति जयपुरी घर्तीं धयादिल । अथेहे  सुविधासम्पन्न स्कुलं अनलाइनमार्फत ब्वकाच्वंसाः नं अज्याःगु कथंया सुविधा हिमाली व पहाडी क्षेत्रय् सम्भव मदुगुलिइ ब्वकेगु ज्या मयायेत/मयाकेत शिक्षा मन्त्रालययात निर्देशन बियागु धकाः सभापति घर्तीइ धयादिल ।

बैठकय् सांसदतयसं थुगुसिया एसइइ जाँच मकायेत सरकारयात सुझाव बिउगु खः।