दोलखा भीन्द्यःयात चःति वल

दोलखा भीन्द्यःयात चःति वल


मंसिर ९ - नाजांगु दोलखा भीन्द्यःया मंगलबाः न्हिनय् १८ क्वःखुसि चःति वगु दु।

मंगलबाः न्हिनसिया १:४३ ताइलंनिसे द्यःया जःव व देपापाखें मदिक्क चःति वगु स्थानीय मनूतयसं धागु दु। भीमेश्वर मन्दिर तथा पूजा व्यवस्थापन समितिया नायः भरत श्रेष्ठं द्यःयात १८ क्वःखुसि  चःति वगु धयादिल ।

भीन्द्यःयात चःति वलकि देशय् अनिष्ट वा अशुभ जुइगु धार्मिक मान्यता दु । जःवपाखें चःति वसाः जुजुपक्षयात व देपापाखें चःति वसाः जनतायात अनिष्ठ जुइगु धार्मिक मान्यता दु। द्यःयात चःति वसेलिइ देगः व्यवस्थापन व गुठियारतयसं स्थानीय रुपय् क्षमा पुजा याःगु दु । थप क्षमा पूजाया लागि चःति हुगु कपाय् जिल्ला प्रशासन ज्याकुया रोहवरय् गृहमन्त्रालयमार्फत राष्ट्रपतिया ज्याकुथिइ छ्वइगु व्यवस्था दु। जुजुया पालय् चःति वइबलय् राजदरबारपाखें क्षमा पूजाया लागि पञ्चवली छ्वइगु चलन दुगु खः।

थ्वया न्हय्  २०७६ फागुन ८ गते १७ क्वःखुसि भीन्द्योयात चःति वगु खः । थगुने १ घाै व १५ मिनेटतक चःति वंबलय् देशय् कोरोना भाइरसया महामारी दुहाँवगु जनविश्वास दु। थ्वया न्हय् नं २०६२/०६३ या  जनआन्दोलनया लच्छि न्हय्, तत्कालिन जुजु विरेन्द्र बंशनाश जुइ लत्याति न्हय् व १९९० सालया भ्वखाय् ब्वये न्हय् नं द्यःयात चःति वगु नायः श्रेष्ठं धयादिल ।

वंगु चैत ११ गते निसें लकडाउन याना ११५ न्हूलिपा छुं महिना न्हय्  नियमित पूजाया लागि चायेकुगु देगः छवालिपा हाकनं बन्द यागुलिइ आः नं  सर्वसाधारणया लागि देगः तिनातगु दु।