प्रा डा. जनकलाल वैद्य मन्त

प्रा डा. जनकलाल वैद्य मन्त


मंसिर ५ - नेपालभाषा विषयस दकले न्हापां विद्यावारिधि याना दिउम्ह साहित्यकार प्रा डा. जनकलाल वैद्य मन्त। वय्कः म्हिगः कछलागा पारूखुन्हू ८८ दँया बैशय् यलया महालक्ष्मीस्थानय् दुगु गणेशमान मेमोरियल अस्पतालय् मदुगु खः।

पार्किन्सन ल्वचं कयाच्वनादीम्ह वय्कयाके लिपांगु इलय् नयेमयइगु लगायतया समस्या खनेदुगुलिं ६ न्हू न्ह्यः अस्पतालय् भर्ना यानागु धकाः वय्कया भाै सविता वैद्य धयादिल।  प्रा डा वैद्यया अन्तिम संस्कार म्हिगः बहनी जूगु दु।

नेपाल सम्वत १०५४ दिल्लागा: ४ खुन्हू जन्म जुयादिम्ह वय्कलं समालोचना , बाखं ,छधा:प्याखं ,प्याखं व अनुसन्धानात्मक लेखपाखें च्वसाः न्ह्याकादीगु दु। वय्कया न्हापांगु बाखं  ल्व:ल नेपाल सम्वत १०६७ स् मचा पत्रिका पिहाँवगु खसाः ने.सं.१०८७ कल्याणी, ने.सं.१०८७ सत्यसतीया विवेचना, ने.सं.११०३ स्वयाच्वंगु मिखा, ने.सं.११०५ स् राष्ट्रिय अभिलेखालय स्थित नेपालभाषा अभिलेख ग्रन्थ,  ने.सं.११०६ स् नेपालभाषाया काव्य सिर्जना प्रवृत्ति, ने.सं.११११ स् आशा सफू कुथिया अभिलेख ग्रन्थया वर्णनात्मक धल:, ने.सं.१११९ स् किर्तिलक्ष्मी (प्याखं) लगायतया वय्कया सफू पिदंगु दु।

वय्कः नेपालभाषा एकेडमीया दुज:लिसें नेपालभाषा परिषदया सल्लाहकार जुयादिइ। २०७६ सालय् वय्कयात ख्वपया दकलें पुलांगु संस्था नेपाल साहित्य मन्दिरं आर वी जोशी फाउन्डेसन प्राज्ञ सम्मानं छ्यापिउगु खः।