सच्छि दंया सत्य मोहन जोशी व डायरी पानाय बुयाव:गु कविताया समालोचकीय परिचर्चा

सच्छि दंया सत्य मोहन जोशी व डायरी पानाय बुयाव:गु कविताया समालोचकीय परिचर्चा


असार २७ - नेवाः विद्यार्थी युनियनया ग्वसालय् नेपालभाषाया निगू सफू श्रीलक्ष्मीश्रेष्ठया ‘सच्छिदंया सत्यमोहन जोशी’ व डा. बाल गोपाल श्रेष्ठया ‘डायरी पानाय् बुयाव:गु कविता’या समालोचकीय परिचर्चाया भर्चुअल ज्याझ्वः जूगु दु।

ज्याझ्वलय शताब्दी पुरुष सत्यमोहन जोशीं नेपालभाषाया काव्यया इतिहास कुलादिसें सफू च्वमिपिंन्त निरन्तर च्वज्या न्ह्यज्याना च्वनेमा धका भिंतुना व सुवाः बियादिगु ख।

ज्याझ्वलय् बिमल ताम्राकारं ‘सच्छिदंया सत्यमोहन जोशी’ सफूया महत्व कनादीगु खःसा, ‘डायरी पानाय् बुयावःगु कविता’ सफूयात कया समालोचकपिं पूर्णकाजी ताम्राकारं‘वैचारिक सचेतता’, ध्रुब मधिकर्मिं सफूया ‘सन्दर्भ म्हिग व थौं’ व डा. ज्योति तुलाधारं ‘डायरी पानाय् बुयाव:गु कविता जिं स्वयेबलय्’विषयस केन्द्रित जुयाः समालोचना प्रस्तुत यानादीगु खः।

ह्याउँनिभाः टाइम्सया संयोजनय् जूगु  ज्याझ्वः सफूनाप सम्बन्धित मदयेधुक्कुंपिं स्वम्ह व्यक्तित्वपिं नांदंम्ह समालोचक इन्द्र माली, मस्कोय् च्वनादीम्ह च्वमिलिसें अनुवादक कृष्ण प्रकाश श्रेष्ठ व समालोचक माधव लाल प्रधानप्रति श्रद्धाञ्जलि देछासें न्ह्याःगु खः।

नेवाः विद्यार्थी युनियनया नायः रिदेन महर्जनया लसकुस न्वचूलिसें न्ह्यागु ज्याझ्वलय् ह्याउँनिभाः पुचःया नायः धनबहादुर महर्जनं नेपालभाषा साहित्य नापनापं थौंया इलय् ‘नेवाः लगानी - नेवाः बजार विस्तार – नेवाः समाजया विकासया लागि’ धइगु अवधारणा ज्वनाः न्ह्यज्यायेमाःगु आवश्यकतायात कुलादिगु ख।

अच्युत रत्न बज्राचार्यं न्ह्याकुगु ज्याझ्वःलय् च्वमिपिं श्रीलक्ष्मी श्रेष्ठं व डा बाल गोपाल श्रेष्ठपाखें थःगु खँ तयादिगु खः।

नेपाल संवत ११४१ तछलागा दशमी कुन्हुं जुमया दबुलिइ संचालन जूगु ज्याझ्वलय् नेपाः, बेलायत, अमेरिका नापं युरोपया थीथी देशय् दीपिं नेपालभाषाया साहित्यकार लगायतं ब्वतिकयादिगु खः।