थाैं बकर इद, सार्वजनिक बिदा

थाैं बकर इद, सार्वजनिक बिदा


साउन ६-  इस्लाम धर्मावलम्बीतयसं थौ इद उल अज्हा अर्थात् बकर इद हनाच्वगु दु। इद उल फित्र अर्थात् रमजानया ७० न्हू खुन्हू बकर इद हनिगु खः ।

इस्लामिक पात्रोकथं १२ गू महिना अर्थात् दिल हिज्जाया १० न्हूखुन्हु थ्व पर्व हनिगु नेपाली जामे मस्जिदया सचिव मन्सुर हुसेनं धयादिल। थाैंया दिं मुस्लिम धर्मावलम्बीतय्सं सुथनिसें म्हो ल्हुया सतिगु मस्जिद वा इदगाहय् वना मका कथं नमाज ब्वनिगु, धेँ पुया भिन्तुना कालबिल याइगु परम्परा दु ।

यँय्या दरबारमार्गय् दुगु नेपाली जामे मस्जिद, काश्मिरी मस्जिदलगायत देय्न्यकंया मस्जिद व इदगाहय् मुस्लिम धर्मावलम्बीत म्वः म्वः जुइगुलिं थुगुसिइ नं कोरोनाया जोखिम दनिगुलिं छेँय् छेँय् च्वना सुरक्षितरुपं हनेत मुस्लिम आयोगं इनाप याःगु दु।

हिजरी संवत कथं १४३९ दँ न्हय् अल्लाहया आदेशय्  इब्राहिमं थः काय् इस्माएल अलेह सलामयात बलिदान बिइत तयार जूगु लुमन्तिइ थ्व पर्व हनिगु राष्ट्रिय मुस्लिम आयोगया पूर्वअध्यक्ष निर्दोष अलीइ जानकारी बियादिल।

सरकारं बकर इदया लसताय् थाैं सार्वजनिक बिदा ब्यूगु दु।