स्वनिगलय् सुपथ मूल्य पसः माघ २ तक तइगु

स्वनिगलय् सुपथ मूल्य पसः माघ २ तक तइगु


मंसिर ८ - नखः लक्षित सुपथ मूल्यया पसः वइगु माघतक सञ्चालन जुइगु जुगु दु ।

सरकारी स्वामित्वय् सञ्चालन जुयाच्वंगु खाद्य व्यवस्था तथा व्यापार कम्पनी लिमिटेडं माघ २ गतेतक पसः सञ्चालन याइगु जुगु खः। सरकारं खाद्य कम्पनी, साल्ट ट्रेडिङ कर्पोरेशन व दुग्ध विकास संस्थानयात वंगु असोज १५ निसें मङ्सिर ७ गते तक सहुलियत भावय् पसः  सञ्चालनया अनुमति ब्यूगु खः।

सरकारं ब्यूगु इलय् कम्पनीया लक्ष्य कथं सामान मिइमफुसाः नं कोरोना महामारीया इलय् नसाज्वलं अभाव जुइके मबिइत सहुलियत मुल्यया पसः सञ्चालनया अवधि थप यागु कम्पनीइ धागु दु। कम्पनीया सूचना अधिकारी शर्मिला न्यौपानेया कथं सरकारं क्वःछिनातगु सहुलियत भावय् हे माघ २ तक २९ गूलिइ बिक्री केन्द्रपाखें सहुलियत मूल्य पसः सञ्चालन जुइ ।

स्वनिगःया ५ गू ठाय् नापं कम्पनीया शाखा ज्याकु दुगु जिल्लाय् पसः सञ्चालन जुइगु कम्पनीइ धागु दु। कम्पनीइ दुगु सामान नापं साल्ट कर्पोरेशनं ब्यूगु चिनी मियावयाच्वंगु दु।

सरकारं क्वःछिउगु कथं खाद्य कम्पनीं माघ २ गतेतक रु १८ य् चिं, रु ७० य् चिनी, रु ८७० य् ध्य व किलोय् ५ तका छुटय् जाकि, केँय् ,  दुसि व तूयुगु केगू मिइगु जुगु दु । खाद्य कम्पनीइ ई थप यासाः नं साल्ट कर्पोरेशन व दुग्ध संस्थानं ई थपया छुं नं  निर्णय मजुगु धागु दु।