सोफा कारखानाय् मिं नयाः १ करोड ६० लख तका बराबरया क्षति

सोफा कारखानाय् मिं नयाः १ करोड ६० लख तका  बराबरया क्षति


साउन १३ - येँय् महानगरपालिका १७ या वनस्थली चोकलिक्कं दुगु थ्रीडी फर्निचरलिसें सोफा कारखानाय् मिं नगु दु। बुधबाः न्हिनय् ४ तार्इपाखें नःगु मिं सशस्त्र प्रहरीया ५ दमकल व ५ ट्यांकरया ग्वाहालिइ स्याःगु खः।

धादिङ्ग छेँय् जुम्ह रामहरी धरेल व भारतीय नागरिक विजय शर्मा संचालन याःगु फर्निचर कारखानाय् मतया तार सर्ट जुयाः मिं नःगु धागु दु।

मिं नःगु जानकारी वयेसातकि सशस्त्र प्रहरी बल नेपाल सुरक्षा वेश ल्हुति बालाजुपाखें सशस्त्र प्रहरी निरीक्षक प्रमिला श्रेष्ठया कमाण्डय् २० म्ह, सशस्त्र प्रहरी बल नेपाल नम्बर २४ गुल्म येँय् नं सशस्त्र प्रहरी निरीक्षक गोरख भण्डारीया कमाण्डय् ३५ म्ह व सशस्त्र प्रहरी बल नेपाल नम्बर १९ गण (विशेष कार्यदल) बगलामुखीपाखें श्यामसंगती महर्जनया कमाण्डय् खटे जूगु ३५ म्ह सशस्त्र प्रहरीया टोलीइ मिं स्याःगु खः।

मिं नयाः १ करोड ६० लख तकाति बराबरया धनमाल नष्ट जूगु प्रारम्भिक अनुसन्धानं सिइदुगु दु।