हलिं नेवाः दबूया ग्वसालय् ग्लोबल नेवाः कन्फरेन्स क्वःचाल

हलिं नेवाः दबूया ग्वसालय्  ग्लोबल नेवाः कन्फरेन्स क्वःचाल


पुस २३ - हलिं नेवाः दबू (वल्र्ड नेवाः अर्गनाइजेशन) झिदँ दुगु लसताय् निन्हुयंक  ग्लोबल नेवाः कन्फरेन्स याःगु दु।

हलिं नेवाः न्ह्योनेया लँय् नांया नेवाः कन्फरेन्स वंगु थिंलाथ्व पुन्हि व थिंलागा पारु (पुष १५ व १६) याःगु खःसाः कन्फरेन्सय् १२ गु देय्या २३ म्हसियां थःथःगु प्रस्तुति न्ह्यब्वगु खः। थुगुसि कोरोना महामारीया कारणं नेवाः कन्फरेन्स भच्र्युयल माध्यमं जूगु खः ।

न्हापांगु दिं कन्फरेन्सया उलेज्या यासें दबूया संरक्षक शताब्दी पुरुष सत्यमोहन जोशीइ नेपालभाषा संरक्षण यायेमाःगुलिं बः बिसें नेवाः साहित्य संस्कृति विश्वब्यापि यायेत अन्तराष्टिय भासं भाय् हिलायंकेमागु खँ न्ह्यथनादिल। मूबक्ता प्रोफेसर डां जेरार्ड टुफां नं गुथिया धार्मिक संसार व नेवाः सभ्यताया ३ गू तथ्य बिषयस न्ववासें ज्यापू समुदायया सांस्कृतिक पक्षय् थःगु खँ न्ह्यब्वयादिल। नायः सिजन श्रेष्ठं लसकुस यानादिगु सत्रय् न्वकू डा.नारायण राजभण्डारीं हलिं नेवाः दबू नं झिदँ दुने याःगु ज्याया बारेय् जानकारी बियादिगु कन्फरेन्सया कजि संयुक्त श्रेष्ठं धयादिल।

डा.उमा प्रधानया नायःसूइ जुगु शिक्षा विषयस न्हापांगु सेसनय् सुनिता डंगोल, प्रनिशा शाक्य व युक्ता बज्राचार्यं,  हलिं नेवाः दबूया पूलाम्ह न्वकु कृष्ण चखुँया नायःस्वीइ जुगु भाषा विषयस निगुगु सेसनय् रुक्साना कपाली, कृष्ण प्रसाद श्रेष्ठ व सुभासराम प्रजापतिं व हलिं नेवाः दबूया संस्थापक दुजः दया शाक्यया नायःस्वीइ जुगु संस्कृति विषयया स्वंगुगु सेसनय् प्रो सावित्री श्रेष्ठ, डा. टिना हो डा.एलिजा लाउ, कुन हन्ट व डां पुन्य सागर मरहट्टां थःथगु प्रस्तुति न्ह्यब्वयादिगु खः ।

अथेहे निन्हुगु दिं अक्सफोर्ड विश्वविध्यालयया प्रो.डा.डेविड गेल्नरया नायःस्वीइ सम्पदा विषयया न्हापांगु सेसनय्  लिसा डंगोल, सुप्रिया मानन्धर, पुष्कर माथेमा व शोवित शाक्यं हलिं नेवाः दबूया छ्यान्जे रश्मिला प्रजापतिया नायःसूइ जुगु अभियान विषयया निगुगु सेसनय् कृपेन्द्र अमात्य लुमु श्रेष्ठ, नरेश नेवाः, राश जोशी व अजू श्रेष्ठं व मेदिना शाक्यया नायःसूइ जुगु कल्नरी हेरिटेज विषयया स्वंगुगु सेसनय्  बिक्रम बैद्य व नरेश ताम्राकारं प्रस्तुति न्ह्यब्वयादिगु खः। अथेहे हलिं नेवाः दबूया संस्थापक नायः डा.बाल गोपाल श्रेष्ठया नायःसूइ जुगु दकलय् लिपांगु क्लासिक लिटेरेचर सेसनय् अनाही टिसेगम व अम्बर मरी मुरे पोखरेलं प्रस्तुति न्ह्यब्वयादिगु खः।

हलिं न्यंक च्वंपिं नेवाःतय्त संगठित यायेत झिदँ न्ह्यः हलिं नेवाः दबूया पलिस्था जूगु खः। निदँ न्ह्यः न्हापांगु ग्लोबल नेवाः कन्फरेन्स नेपालय् जूगु खः।