१२ दँय् जुइगु सिद्धि दनेगुया तयारी शुरू (तस्विर)

१२ दँय् जुइगु सिद्धि दनेगुया तयारी शुरू (तस्विर)


भदौ ८ - नेपाःया ऐतिहासिक प्राचिन सिद्धिदनेगुया तयारी शुरू जूगु दु। यलया जलदेशय् सापारू खुन्हूनिसें सिद्धिदनेगुया तयारी शुरू जूगु खः। सिद्धिदनेगु धकाः शक्ति संचयलिसें शक्तिया पुनःस्थापना याइगु खः।

सिद्धिदनेगुया तयारी कथं सापारू खुन्हू सापारूया जात्रा क्वचायेधुक्कां बहनी न्येकू मंकाः बाजं खलकं बाजं थाना दिगु द्यः, पीठ द्यः चाहिला जलदेय्या मूध्वाखां पिनेतक बाजं थागु खः। अनंलिपा बाजं थायेगू दिकाः बाजं खलकं बाजं लितहइगु चलन दु। थथे यायेधुक्कां जलदेशय् छुं नं कथंया बाजं थायेमज्यूगु मान्यता दु। अथेहे छुं नं भ्वय् यायेमज्यूगु प्रचलन दु।

हरिसिद्धि भवानीया देगलय् दुनेपिने तयातःगु गंत नं फुक्क थाय्मजिकं चिनातइसाः सापारूया चान्हय् निसें देगःया मूलुखा तिनाः द्यःपि(पुजारी) बाहेक मेपिं सु नं दुहाँवनिमखु।

अथेहे सिद्धिदनेगुया तयारीया झ्वलय् १२ दँया दुने मदुपिं द्यःपिनिगु ठासय् मदुम्ह द्यःया तःधिकम्ह काय् वा तःधिकम्ह काय् द्यः जुइत योग्य मजुसाः थःलाम्हसित भर्ना याइ, भर्ना जुपिन्त विशेष पूजा यानाःदेगलय् दुकयाः प्याखं ल्हुइगु, बाजं थायेगु स्यनिइ। अथेहे देगः मर्मत यायेगु, न्हूगु मतु दयेकेगु, वसःत सुइकिगु, भेखासी कावनेगु, स्वनिगःया थीथी ठासय् पीठ कावनेगु, नासः पुजा, स्वां तपुलिं पुयाः प्याखं ल्हुइगु, कलश स्थापना यायेगु, मिसाःभु, मिजंभुधकाः देय् भ्वय् नकेगु , मूप्याकिगु जात्रा, ठाय् ठासय् द्यःखः यंकिगु धकाः ठाय् ठासय् जात्रा क्यनिगु याइ।

थ्वहे दथुइ नेवाः परम्परागत बाजं, प्याखं संरक्षण यायेगु लागि थीथी कथंया ग्वाहालि यानावयाच्वगु यल महानगरपालिका वडा ल्याः २८ नं न्येकू मंकाः बाजं खलयात छज्वः भूस्या बाजं लःल्हागु दु। म्हिगः जूगु धार्मिक ज्याझ्वःया दथुइ वडा अध्यक्ष राजेश महर्जनं बाज खलःया गुरूयात भूस्या बाजं लःल्हानादिगु खः।