गुला लिपा लुँ खुपिन्त ज्वन

गुला लिपा लुँ खुपिन्त ज्वन


पुस  १६ - महानगरीय प्रहरी वृत्त बौद्ध गुलाया अनुसन्धानलिपा लुँवहँ खुइगु पुचयात ज्वनेत ताःलागु दु।

महानगरीय प्रहरी वृत्त बौद्धया प्रमुख नवीन कार्कीया नेतृत्वय् लुँवहँ खुइपिं ७ म्ह अभियुक्तयात लागुवासःनापं ज्वंगु खः। प्रहरी नायब उपरीक्षक कार्कीया कथं झापा छेँय् जुया येँया आरुबारी च्वनिम्ह २७ दँया सोनाम लामा उगु पुचया मुख्य नाइके खः । लामालिसें चोरी व लागुऔषधय् संलग्न झापा कन्काईया २५ दँया सनम माझी, शिवसताक्षीया २३ दँया विजय लिम्बू, भोजपुर पौवादुङ्माया ३२ दँया सन्तोष विक व ३५ दँया सूर्यबहादुर श्रेष्ठ , सिन्धुपाल्चोककया ३७ दँया सञ्जीव तामाङ व भारतीय युवराज बलु बबरयात ज्वगु खः ।

ताइलंनिसें खुइगुलिइ संलग्न अभियुक्त मालेत प्रहरीइ यक्व मेहनत याःगु खः। ७ म्हसित बुधबाः ज्वना खोजतलास याबलय् फुक्कं घटनाक्रम पिहाँवगु खः। येँया बौद्धयात लक्ष्य याना ताइलंनिसें उगु पुच खुइगुलिइ संलग्न जुगु सिइदुगु दु। न्हिनय् छेँय् सुं नं मदुगु  अवस्थाय् , बन्द जुगु सटर व लुखा तछ्याना खइगु यानाच्वंगु प्रहरीया प्रारम्भिक अनुसन्धानं सिइदुगु दु ।

अभियुक्ततनापं दुगु अंगु व सिखः याना ६४ तोला ३४ लाल लुँ, ५ किलो ६९३ ग्राम वहँ व ५ लख ३३ द्वः व ७० तका प्रहरीइ बरामद याःगु दु । प्रहरीइ खुइगु ज्याया मुख्य अभियुक्त लामा व मेपिं अभियुक्तया कोठा व बबरया पसलं याना लुँवहँ बरामद याःगु खः।

थीथी छेँय् व पसलं खुया कागु लुँ अभियुक्ततयसं जोरपाटी बराल पेट्रोल पम्पलिक्कया गणेश टन्च सेन्टर नांया लुँवहँ परीक्षण केन्द्रय् यंका उकिया स्वरुप परिर्वतन याना मयाच्वंगु लुगु खः । खुइगुलिइ ग्वाहालि याना सामानया स्वरुप परिर्वन याना मिइम्ह पसःथुवा  २३ दँया बबरयात नं प्रहरीइ ज्वने धुक्कुगु दु ।

बबरं सञ्चालन यानावयाच्वंगु पसः आःतक दर्ता मजुगु प्रहरीइ धागु दु । आःतक लुँवहँ व धिबाः खुगु धासें महानगरीय प्रहरी वृत्त बौद्धय् ९ म्हसियां जाहेरी बिइधुक्कुगु व छम्हसियां जानकारी जक ब्यूगु बौद्ध प्रहरी प्रमुख कार्कीइ धयादिल ।

प्रहरीइ इमिकें दुगु लागुवासः खैरो हेरोइन २७ ग्राम, ५ लख ३२ द्वः, अमेरिकी डलर ६, ६० तोला ८७ लाल लुँ,५ किलो ६९३ ग्राम वहँनापं लुटपाटय् प्रयोग जुगु वाग्मती प्रदेश ०२०२० प ६६११ व वाग्मती प्रदेश ०२–००५ प ३८३५ ल्याःया स्कुटर बरामद याःगु दु। अथेहे ल्यापटप, मोबाइल, लागुवासः लनेगु व लुँवहँ लनेगु ताल्जु व २ गू यन्त्र, तिसाः गाले यायेत प्रयोग जुइगु उपकरण पत्थरलगायत सामग्री बरामद याःगु दु।