नरःया गनं मदुगु जात्रा थुगुसिइ मजुइगु

नरःया गनं मदुगु जात्रा थुगुसिइ मजुइगु


कार्तिक १५ - येँया नरःया गनं मदुगु जात्रा थुगुसिइ मजुइगु जुगु दु ।

गनं मदुगु जात्रा थुगुसिइ स्वनिगलय् अप्वयाच्वंगु कोरोना भाइरसया सङ्क्रमणया कारण स्थगन जुगु येँय् महानगरपालिका–५ या अध्यक्ष रमेश डङ्गोलं जानकारी बियादिल। जात्रा मयासाः नं जात्राया झ्वलय् यायेमाःगु पूजा विधि धासाः पुजारीलिसें सीमित गुठियारत च्वना याइगु धकाः वयकलं धयादिल।

दँय् दँसं थुगु जात्रा कतिं पुन्हिया कन्हय् खुनुनिसें प्यन्हुतक जुइगु खः । झ्वःलिक्क स्वंगू खः पिकयाः न्ह्याकीगु थ्व जात्रा देया मेमेगु  जात्रा सिबें यक्व पाः । खःया गजू क्वस्वकाः गर्भगृह व द्यः च्वय् लाकाः खः दयेकीगु अले द्यः तयातःगु गर्भगृहयात क्वं चाःहिकीगु याइ । लिसें खतय् नँस्वाःगु सीस्वां तइगुलिं नं थ्व जात्रायात गनं मदुगु जात्रा धायेगु याःगु खः । जात्राय् चाःहिकीगु स्वंगू खःयात नरः लागा चाःहिकीबले स्थानीयपिन्सं पूजा लिसें लसकुस याइगु चलन दुसा खः झःझः धायेकेत ब्वइगु सीस्वां खःया गजू चाःहिकीबले कुतुं वनीगुलिं व मुनीपिं मनूत म्वःम्वः जुइ। उज्वःगु सीस्वां मचा बुइत्यंपिं मिसापिन्त न्वतुंकल काःसा स्याइगु पाः जुइगु विश्वास नं दु ।

जात्राय् ५ म्हसियां धिमेबाजं थायेमाःगु व ३० म्हसियां खः क्वबिइमाःगु प्रचलन दु। जात्रा स्वयेत नरःया फुक्कं गुठियार मुनेमाःगु नियम दुगुलिइ कोरोनाया महामारीया इलय् सङ्क्रमण फैले जुइफुगु खतरां थुगुसिया जात्रा स्थगन जुगु वडा ज्याकुथिइ धागु दु।