अन्जना ताम्राकारया लुमन्तिया ज: पिदन

अन्जना ताम्राकारया लुमन्तिया ज: पिदन


बैशाख ५ - च्वमिलिसें उद्यमी अन्जना ताम्राकारया नेपालभाषाया हाइकु मुना लुमन्तिया ज: पिदंगु दु।

अन्तर्राष्ट्रिय हाइकु दिवसया झ्वलय् शनिबा: यलया लोक साहित्य परिषदय्  ईलोहं प्रकाशनया प्रबन्ध निर्देशक नरेश वीर शाक्यया सभापतित्वय् जूगु ज्याझ्वलय् हाइकु मुना सफूया बिमोचन जूगु ख:। बाङ्मय् शताब्दी पुरुष सत्यमोहन जोशी, समालोचक लिसें साहित्यकार डा पुष्पराज राजकर्णिकार, ईलोहं प्रकाशनया प्रबन्ध निर्देशक शाक्य, नेपाल प्रज्ञा प्रतिष्ठानया प्राज्ञ ध्रुब मधिकर्मी, बागमती प्रदेशया सांसद अजय क्रान्ति शाक्य, नेवाः हाइकु ख्यःया कजि सुरेश प्रधानं मंकाःकथं हाइकु मुना लुमन्तिया ज: या विमोचन यानादिगु खः।

साहित्यकार दिलबहादुर चित्रकारया लसकुस न्वचुलिसें न्ह्याःगु ज्याझ्वलय् शताब्दी पुरुष जोशी, प्रज्ञा प्रतिष्ठानया प्राज्ञ मधिकर्मी, समालोचक डा  राजकर्णिकार, ईलोहंया प्रबन्ध निर्देशक शाक्य, नेवाः हाइकु ख्यःया कजि प्रधानं पिहाँवगु सफूया समालोचना लिसें नेपालभाषाय् हाइकु लेखन, हाइकुया समालोचना लगायतया बारेय् थःथःगु धारणा तयादिगु खः।

च्वमि अन्जना ताम्राकारं याकनं थःगु उपन्यास व  चिबाखं सफू नं पिहां वयेत्यंगु जानकारी बियादिल। 

लुमन्तिया ज: ईलोहं प्रकाशनं पिकागु खसाः नेवाः हाइकु ख्यः नं वितरणया भाला काःगु दु।