रविना श्रेष्ठ जुयादिल ‘हस्तकला डिजाइनिङ प्रतियोगिता’ या बिजेता

रविना श्रेष्ठ जुयादिल ‘हस्तकला डिजाइनिङ प्रतियोगिता’ या बिजेता


भदाै २१  - नेपाल हस्तकला महासंघ व इन्टेरियर डिजाइनर्स एसोसिएशन अफ नेपालं(आइडिया नेपाल) याःगु हस्तकला डिजाइनिङ धेधेबल्लाय् रविना श्रेष्ठ न्हापं जुयादिगु दु। 

हस्तकलाया व्यवसायिक संरक्षण व प्रवर्द्धनया लागि महासंघ व आइडिया नेपालं याःगु धेधेबल्लाय् रविना श्रेष्ठ न्हापं जुयादिगु खः। अथेहे रोशन ठाकुर व निलिमा प्रधान छसिकथं ल्यू व लियां ल्यू जुयादिगु दु। बिजेतातय्त महासंघं छसिकथं २५ द्वःतका, १५ द्वः तका व १० द्वः तका नापं  इन्टेरियर डिजाइनिङ हस्तकला अवार्डपाखें सम्मानित याःगु खः ।

आइतबाः येँय् जूगु ज्याझ्वलय् संस्कृति, पर्यटन तथा नागरिक उड्डयन सचिव यादव प्रसाद कोइरालां विजेतातय्त सिरपा लःल्हानादिगु खः। अबलें येँय् महानगरपालिकाया उपमेयर हरिप्रभा खड्गी व यल महानगरपालिकाया उपमेयर गीता सत्यालं त्यापिन्त भिन्तुना देछानादिगु खः।

हस्तकला दँ २०२१ या कजिलिसें महासंघ उपाध्यक्ष रवीन्द्र शाक्य, आइडिया नेपालया अध्यक्ष बिन्द्रा कक्षपति प्रधानं धेधेबल्लाया बारेय् नवानादिगु खः ।

नेपाली हस्तकलायात इकथं परिमार्जन याना यंकेगु उद्देश्यनापं हस्तकला दँ २०२१ या झ्वलय् हस्तकलाया प्रवर्द्धनात्मक अभियानकथं हे निगुलिं संस्थादथुइ सहकार्यया लागि उगु संझौता जूगु खः। विश्वव्यापी कोरोनाया कारण हस्तकला निर्यात प्रभावित जुयाच्वंगु सन्दर्भय् नेपाली हस्तकला बजारयात चलायमान यायेगु ज्याय्  ग्वाहालि यायेत महासंघं आइडिया नेपाललिसें सहकार्य याःगु खः।