फम्पीइ हरिशंकर जात्राया झ्वलय् थौं छोयला भू

फम्पीइ हरिशंकर जात्राया झ्वलय् थौं छोयला भू
फाइल किपाः


असोज १३ - पुलां नेवाः बस्ती फम्पीइ हरिशंकर जात्राया झवलय् थौं छोयला भू हनाच्वंगु दुु । दँय् दसं हरिशंकर जात्राया झ्वलय् यंलागा अष्टमी खुन्हू छोयला भू जुइगु खः।  

फम्पिइ सुथंनिसें हरिशंकर देगलय् भक्तजनत म्वःम्वः जुयाच्वंगु दु। जात्राया झ्वलय् यंलागा नवमी, दशमी व एकादशीया जात्रायात विशेषरुपय् काइगु स्थानीय विजय महर्जनं धयादिल। बाछि तक जुइगु जात्राय् कन्हय् जाभू जुइसा कंस मू जात्रा जुइ।जात्राया झ्वलय् हन्चा चान्हय् स्थानीय कनकेश्वर (दक्षिणकाली), अघोरेश्वर (नीलबाराही) व  नन्दिकेश्वर (इन्द्रायणी) या रथयात्रा जुइ वयकलं धयादिल।  ३ रथयात हन्चा चान्हय् समाः यानाः थीथी बाजं थाना चाहिकिगु वयकलं धयादिल ।

वंगु असोज २ गते यंलाथ्व द्धादशी निसें न्ह्यागु जात्राया झ्वलय् गोपालेश्वर महाद्यः, शिखर नारायण, अजिमा, दक्षिणकाली, नील बाराही, इन्द्रायणी, झम्केश्वरी, शेषनारायण, काल भैरब, स्वच्छन्द रक्त भैरब व महालक्ष्मीपिनि खःजात्रा जुइसाः जात्रा यंलागा एकादशी खुनु क्वचाइगु खः।

फम्पी जात्रा पर्व सञ्चालन तथा संरक्षण समितिं जात्रा व पूजाया धलः पिथनाः थुगुसि कोभिद संक्रमणपाखें सचेत जुयाः जात्रा हनाच्वंगु दु।