जलदेय्या १२ दँय्या सिद्धि दनेगु पर्वया झ्वलय् सौल दनेगु क्वःचाल

जलदेय्या १२ दँय्या सिद्धि दनेगु पर्वया झ्वलय् सौल दनेगु क्वःचाल


असोज १९ -  हरसिद्धिया मूल अर्थ हर अर्थात हरि, शिव महादेव, व सिद्धि अर्थात शक्ति। शिवया शक्ति रूपं प्रतिस्थापन शिवशक्ति हर सिद्धि धकाः माने यानाःवयाःच्वगु दु। अथेहे स्वम्ह द्यःया शक्ति , ब्रम्हशक्ति, विष्णु शक्ति व रूद्रशक्ति। अथेहे ब्रम्हायणी, महेश्वरी, कुमारी, अले महासरस्वती, महाकाली, महालक्ष्मीया रूपय् कयातःगु दु। हरिसिद्धि द्यःथाय्  वहे स्वम्ह द्यःपिनिगु शक्ति कथं त्रिशक्ति भवानी धकाः स्वंगः कलशत स्थापना यानाः तःगु दु।

थ्वहे हरिसिद्धि द्यःया पुनःस्थापना यायेगु कथं १२ दँय् छकः सिद्धि च्वनेगु धकाः शक्ति संचय यायेगु कथं १२ दँय्या सिद्धि दनेगु पर्व न्ह्यानावयाःच्वगु दु। द्यःथाय् नियमय् च्वनाः ज्या यायेमाःपिं च्याभू व देवगण याना २९ म्ह पुजारीपिं दु।

वहे द्यःपिं १२ दँया दुने मदयेधुक्कुंपिनिगु ठासय् मदुम्हसियां तःधिकम्ह काय् दुकाय्माःगु चलन दु। थुगुसिया सिद्धि दनेगु पर्वय् च्याभू व देवगण यानाः १२ म्ह न्हूपिं द्यःत दुकागु दु। न्हूपिं द्यःपिं दुकाइगु झ्वलय् द्यःथाय् वनाः विशेष पुजा यानाः द्यः जुइम्हसिगु ठासं लुखा पुजा यायेगु चलन दु। फुक्कं न्हूपिं द्यःपिन्सं वहे दिंनिसें न्ह्याबलें नियमय् च्वनाः तूयुगु वसः फिनाः च्वनेमाः।

लुखा पुजा लिपा  देगः दुनेया नियम कथं गुरू नालाः गुरू नापं वनाः द्यःथाय् विशेष पुजा यावनेमाः। वहे दिं निसें न्हू भर्ना जुम्हसियां भ्वय् ताःलाकाः द्यःथाय् सकल पुजारीपिन्त भ्वय् नकेमाःगु चलन दु। उखुन्हूनिसें सनिलय् सकल पुजारीपिं छेँय् वयाः प्याखं ल्हुइम्हसित छगू ताल प्याखं स्यनेगु व बाजं थाइम्हसित बाजं थायेगु स्यनेगु न्ह्याकिइ।

अनं लिपा गुरूं माःगु कथं फुक्कं स्यनिइ। प्याखं वा बाजं स्यनिबलय् छुं नं कथंया बाजंत छ्यलिमखु, म्हुतुया तालय् जक स्यनिइ। प्याखं ल्हुइगु व बाजं थाय्गु स्यने क्वचाय् धुक्कां छगू कथं जाँच कायेगु कथं फुक्कं पुजारीत च्वनाः बाजं थाना प्याखं क्यनिइ। थुकियात सौल दनेगु धकाः धाइ।

झीगु नेवाः परम्पराकथं छुं नं भजनकिर्तनय् न्हूपिं दुहाँवल धासाः इमित नियमय् तयाः नासः द्यः साधना यानाः पुजा यानाः गुरू नालाः तालिम बिइगु याइ। तालिम क्वःचायेधुक्कां गुरूपिं नापं सकल मुनाः तालय् लाःमला, ज्यू मज्यू धकाः परीक्षण यायेगु यात सौल दनेगु धकाः धयातगु दु।

वहे कथं वंगु ञलागा एकादशी खुन्हू १२ दँया सिद्धि दनेगु ज्याझ्वःकथं द्यःथाय् सकल देवगणत मुनाः प्याखं ल्हुइगु व बाजं थायेगुया परीक्षण कथं सौल दनेगु याःगु खः। वंगु सापारू खुन्हू बहनी बन्द याःगु बाजं वहे सौल दनेगु दिं खुन्हू थाना न्हूपिं पुलांपिं सकसियां नासः पुजा यानाः प्याखं ल्हुइगु खः। थ्व खुन्हू हरिसिद्धि द्यःया जात्राया इलय् क्यनिगु १९ गू दृश्यत मध्ये शुरूनिसें १० गू दृश्य जक ल्हुइगु याइ।

( श्रोतः त्रिशक्ति भवानी द्यःया द्यःपि(पुजारी) लिसें संस्कृतकःमीलिसें हरिसिद्धि माध्यामिक विद्यालयया पूर्व प्रधानाध्यापक धर्मगोविन्द महर्जन)