हरसिद्धि त्रिशक्ति भवानीया १२ दँया सिद्धि दनेगु पर्व: पीठ पूजा क्वःचाल

हरसिद्धि त्रिशक्ति भवानीया १२ दँया सिद्धि दनेगु पर्व: पीठ पूजा क्वःचाल


जितेन्द्र महर्जन/नेपालमण्डल टेलिभिजन, कार्तिक १४ - स्वम्ह द्यःपिनिगु शक्ति -  ब्रम्हशक्ति, विष्णु शक्ति व रूद्रशक्ति, अथेहे ब्रम्हायणी, महेश्वरी, कुमारी, अले महासरस्वती, महाकाली, महालक्ष्मीया रूपय् कयातःगु दु।  थ्वहे स्वम्ह, स्वम्ह द्यःपिनिगु शक्तिया कथं कयातःगु छगू शक्ति त्रिशक्ति भवानी धकाः यलया जलदेशय् विराजमान जुयाच्वंगु दु ।

ऐतिहासिक व सांस्कृतिक रूपं तःमिगु नेवाःतय्गु पुंलागु बस्ति जलदेय्यात नेपाःया हे न्हापांगु ख्वाःपा पुयाः द्यपिन्सं प्याख ल्हुइगु जात्रा शुरू याःगु ठाय् कथं नं इतिहासय् म्हसिका बियातःगु दु।

जल,जतल, जेष्ठापुरया नामं म्हसिका दुगु थुगु हरसिद्धि त्रिशक्ति भवानीया थुगुसिइ पुनःस्थापना कथं १२ दँया सिद्धि दनेगु पर्व न्ह्यानाच्वंगु दु।  थ्व पर्वया छगू ज्याखँ कथं पीठ पूजायात कयातःगु दु।

वंगु कौलागा अष्टमी, कार्तिक १२ गते शुक्रबाः स्वनिगःया थीथी शक्ति सम्पन्न १२ मूल शक्ति पीठय् वनाः तान्त्रिक विधि कथं साधना यानाः शक्ति संचय यायेगु ज्या जूगु दु।

साधना पूजाया झ्वलय् सुनागूया बालकुमारी, च्वःबहाःया क्वयँना गणेद्यः, किपूया जालन्धर, बःखुया विष्णुदेवी, सितापाइलाया हरसिद्धि, म्हैपीया म्हैपीअजिमा, भीमसेनगोलाया भिमसेनगोला देगः, दधिकोटया हिन्चोक  भैरव, सिद्धिपुरया बसु पीठ व  जलया पिठय् निबः व जलद्यः यानाः १२ शक्तिपीठय् पूजा याःगु खः।

पिठ पूजा वनेन्हय् जलद्यः, निबः व पीठय् वनाः द्यःभागि यानाः थीथी ठाय्या शक्तिपीठय् पुजा याःवनेगु परम्परा दु। पुजा वनेगु झ्वलय् २९ देवगणतदथुइ थःथ नवायेज्यू, थिइज्यू तर वय्कपिन्त मेपिन्सं नवायेगुलिसें थिइमज्यूगु परम्परा दु।

पीठ पुजा यायेगु झ्वलय् द्यःया न्ह्यने ४ द्यःया मूल पात्र द्यःपिं तूयूगु गां तपुया च्वनिइ, तां थानाः तान्त्रिक विधिं मन्त्र स्त्रोत पाठ यानाः पीठ द्यःया आव्हान यानाः शक्तिसंचय याइ। १२ ठासय् वहे कथं साधना यानाः मोहनी फयेमाः ।

हरसिद्धि द्यःया शक्ति पाःमजुइकेगु निति नं शक्तिसम्पन्न पीठय् वनाः शक्ति पुनःस्थापना यायेगु कथं शक्ति संचय यायेगु रूपं पीठ पुजायात कयातःगु दु।

थ्वहे दथुइ, पीठ पूजाया लागि यल महानगरपालिका वडा ल्याः २८ व २९ लिसें थीथी ठासय् च्वंगु स्थानीय निकाय, जिल्ला प्रशासन ज्याकु, प्रहरी प्रशासन, ट्राफिक प्रहरीइ सुरक्षालिसें यातायात व्यवस्थापनय् ग्वाहालि याःगु खः।  

( श्रोतः त्रिशक्ति भवानी द्यःया द्यःपि(पुजारी) लिसें संस्कृतकःमीलिसें हरिसिद्धि माध्यामिक विद्यालयया पूर्व प्रधानाध्यापक धर्मगोविन्द महर्जन)